Поранешниот американски претседател Доналд Трамп во средата изјави дека „било преубаво да се гледа“ како полицијата во Њујорк упаднала во зградата на Универзитетот Колумбија, окупирана од пропалестински демонстранти, нарекувајќи ги „бесни лудаци и симпатизери на Хамас“.
На митинг за претседателската кампања во Висконсин, Трамп рече дека „Њујорк е под опсада“ и го поздрави апсењето на околу 300 демонстранти.
Некои членови на Републиканската партија ги обвинија универзитетските лидери за игнорирање на антисемитската реторика и малтретирањето на пропалестинските протести низ САД.
Трамп ја предупреди публиката на митингот дека нивните „градови и села ќе прифатат луѓе од Газа“, мислејќи на претходните медиумски извештаи дека администрацијата на претседателот Џозеф Бајден планира да прифати бегалци од Газа во Соединетите држави.
Трамп во средата одржа собири во Висконсин и Мичиген, негови први големи предизборни собири откако започна неговото судење на 15 април во Њујорк под обвинение дека фалсификувал деловни документи преку кои на порно актерката Сторми Даниелс ѝ платил 130.000 долари за да ја спречи да зборува јавно за нивната наводна афера.
Висконсин и Мичиген се меѓу „поколебливите држави“ кои имаат одлучувачко влијание врз исходот на претседателските избори, а во кои Републиканската и Демократската партија имаат слично ниво на поддршка, па изборните резултати во нив не се предвидливи.
