Претседателскиот кабинет на Јужна Кореја денеска го осуди договорот постигнат меѓу Русија и Северна Кореја со кој ветуваат заемна одбранбена помош во случај на војна и соопштија дека ќе размислат за испорака на оружје за Украина.
Коментарите на висок претседателски функционер, кој сакаше да остане анонимен, дојдоа неколку часа откако севернокорејските медиуми објавија детали за договорот постигнат меѓу нивниот лидер Ким Џонг Ун и рускиот претседател Владимир Путин за време на вчерашниот самит во Пјонгјангг.
Кабинетот на јужнокорејскиот претседател Џун Сук-Јол објави соопштение во кое го осудува споменатиот договор, нарекувајќи го закана за безбедноста на Југот и кршење на резолуциите на Советот за безбедност на ОН.
Кабинетот исто така истакна дека договорот ќе има негативни последици за односите меѓу Сеул и Москва.
Претседателски функционер, исто така, рече дека поради договорот, Сеул ќе размисли за испорака на оружје за Украина за да ѝ помогне во борбата против Русија.
Јужна Кореја, извозник на оружје поддржан од САД, обезбеди хуманитарна помош и друга поддршка за Украина и се приклучи на економските санкции наметнати од САД кон Москва.
Сепак, Јужна Кореја досега директно не ѝ даваше оружје на Украина, наведувајќи ја долгогодишната политика да не испорачува оружје на земјите активно вклучени во конфликтот.
Самитот меѓу Ким и Путин се случи кога САД и нивните сојузници изразија загриженост за можниот договор за оружје во кој Пјонгјанг ќе и ја даде на Москва муницијата што и е потребна за нејзината војна во Украина, во замена за економска помош и технологија поврзани со нејзината нуклеарна и ракетна програма.
По самитот, Ким рече дека двете земји имаат „огнено пријателство“ и дека договорот е нивниот „најсилен договор досега“.
Тој вети целосна поддршка на Русија во војната со Украина.
Во последниве месеци, Ким ја направи Русија свој приоритет бидејќи наметнува надворешна политика насочена кон проширување на односите со земјите кои се против Вашингтон.
