Виетнамскиот суд во вторникот ја отфрли жалбата на виетнамската претприемачка и милијардерка Труонг Мај Лан (68) и ја потврди нејзината смртна казна за една од најголемите банкарски измами во светот тешка над 12 милијарди долари, објавија локалните медиуми.
Апелациониот суд во Хо Ши Мин ја потврди смртната казна, наведувајќи дека нема валидни причини за намалување на нејзината казна.
„Злосторствата на Лана предизвикаа сериозни последици, а нема олеснителни околности што би ѝ ја намалиле казната за проневера и поткуп“, наведуваат судиите во пресудата.
Таа е една од ретките жени во Виетнам кои се осудени на смрт за ваков тип на измама, иако законот во Виетнам вели дека ако може да врати 75% од она што го земала, нејзината казна може да биде заменета со доживотен затвор.
Аферата излезе во јавноста откако судечкиот суд во април утврди дека милијардерката тајно земала заеми од 44 милијарди долари од Комерцијалната банка Сајгон, петтиот по големина заемодавател во земјата. Мој Лан земала заеми и готовина повеќе од 10 години преку лажни компании. Обвинителите веруваат дека околу 27 милијарди долари можеби никогаш нема да бидат вратени.
Иако на моменти беше пркосна за време на судењето, на последните судски рочишта изјавила дека ѝ е срам што исцрпила од државата толку многу пари и дека единствена мисла е како да го врати она што го земала.
Кој е Труонг Мој Лан?
Родена во кинеско-виетнамско семејство, Труонг Мај Лан започнала како продавачка на тезги на пазарот каде продавала козметика со нејзината мајка. Таа почна да купува земјиште и имот откако Комунистичката партија воведе економски реформи во 1986 година. До 1990-те, таа поседувала големо портфолио на хотели и ресторани.
Кога беше осудена во април оваа година, таа беше на позицијата претседател на управниот одбор на нејзината компанија за недвижнини, Ван Тин Фат Груп. Заедно со неа, осудени сѐ уште 85 обвинети - четворица на доживотен затвор, а останатите добија затворски казни од 20 години до три години условни. Сопругот и внуката на Труонг Мај Лан добија затворски казни од 9 и 17 години, соодветно.
Наводно, Државната банка на Виетнам потрошила неколку милијарди долари за докапитализација на Комерцијалната банка Сајгон и спречување на ширење на банкарска паника. Обвинителите тврдат дека злосторствата на Труонг Мај Лан се „огромни и без преседан“.
Нејзините адвокати во жалбата наведоа дека таа работи напорно за да ги најде потребните 9 милијарди долари што е можно побрзо, но се покажа дека е тешко да се продаде нејзиниот имот.
Таа поседува луксузни недвижнини во градот Хо Ши Мин и бројни акции или удели во други компании. Севкупно, државата идентификувала повеќе од 1.000 различни средства поврзани со измамата, а властите засега ги замрзнаа.
„Вкупната вредност на нејзиниот имот всушност го надминува износот на бараната компензација“, изјави адвокатот Нгујен Хју Тип, додавајќи:
„Сепак, потребно е време и напор за да се продаде, имајќи предвид дека тие се претежно недвижен имот и потребно е време да се продаде. Труонг Мај Лан се надева дека судот може да ѝ обезбеди најповолни услови за да продолжи да ја плаќа отштетата“.
Инаку, Виетнам смртната казна ја третира како државна тајна. Владата никогаш не открива колку луѓе се осудени на смрт, иако групите за човекови права велат дека има повеќе од 1.000 и дека Виетнам е еден од најголемите светски џелати. Најчесто има долги одложувања, па осудените на смрт често чекаат многу години пред да се изврши смртната казна. Ако Мај Лан успее да ги врати 9-те милијарди долари пред тоа да се случи, нејзиниот живот најверојатно ќе биде поштеден.
