Денеска ќе се пребројуваат гласовите во пет избирачки места по случаен избор во секоја изборна единица, објави Изборната комисија на Грузија.
Тие одлучија да го сторат тоа откако меѓународните набљудувачи предупредија на недостатоците на саботните парламентарни избори, на кои победи владејачката партија, а опозицијата не ги признава резултатите.
Регионалната изборна комисија ќе ги преброи гласовите на пет избирачки места кои ќе се избираат по случаен избор во секоја изборна единица“, соопштија од Изборната комисија.
Според официјалните резултати, владејачката партија Грузиски сон победи на парламентарните избори во саботата.
Опозицијата и претседателката на Грузија, Саломе Зурабичвили не ги признаваат резултатите, а меѓународните набљудувачи од Организацијата за европска безбедност и соработка, Советот на Европа, НАТО и Европскиот парламент укажаа на недостатоците во изборниот процес - нееднакви услови, притисоци и тензии.
Според нивните изјави, група грузиски набљудувачи пронашле и докази за измама, барајќи поништување на најмалку 15 отсто од гласовите.
Европската унија и САД, вклучително и НАТО, повикаа на независна истрага за извештаите за прекршување.
Во меѓувреме, десетици илјади луѓе учествуваа на масовните протести против владејачката партија во Тбилиси во понеделникот.
На учество во протестите повика и претседателката Зурабичвили.
Во меѓувреме, унгарскиот премиер Виктор Орбан, чија земја во моментов претседава со Советот на ЕУ, сè уште е во посета на Грузија.
Многу членови на унијата ја критикуваа посетата во понеделникот како избрзана, а шефот за надворешна политика на ЕУ, Жозеп Борел, јасно стави до знаење дека Орбан не ја претставува ЕУ во Тбилиси.
