Украинскиот претседател Володимир Зеленски изјави дека неговиот тим подготвува четири нови безбедносни договори за Украина, со цел да ја зајакне одбраната на земјата која е во војна со Русија.
„Кратко резиме на денот. Нашиот тим подготвува четири нови безбедносни договори за Украина. Ќе започнеме преговори многу наскоро и ќе подготвиме документи за потпишување многу брзо“, рече Зеленски во говорот доцна во понеделникот.
Зеленски рече дека безбедносниот договор што го подготвува неговиот тим ќе опфати неколку прашања како што се одбранбената поддршка, финансиите и хуманитарната соработка.
„Со тоа ќе имаме речиси триесет вакви договори со нашите партнери. Нашата цел беше да вклучиме различни земји, не само членки на НАТО“, рече Зеленски, нагласувајќи дека сите земји за кои станува збор се подеднакво подготвени да ѝ помогнат на Украина да ги „одбрани заедничките вредности“.
„Без разлика што се случува во светот, ни требаат сопствени алатки за поддршка на нашиот народ и нашата земја, наши безбедносни договори кои ќе функционираат под какви било услови. Токму тоа го правиме“, додаде тој.
Украина веќе има потпишано билатерални безбедносни договори со 24 земји, вклучувајќи ги САД, Велика Британија, Германија, Франција и Јапонија, како и со ЕУ.
