Авиокомпаниите кои обезбедуваат евтини летови ја почувствуваа се поголемата аеродромска криза која се одразува не само во големите аеродроми и линии. Нискобуџетнитe авиокомпании се очекува да го намалат бројот на летови во текот на летната сезона иако се очекуваше конечно да се вратат во целосен капацитет како пред кризата предизвикана од Ковид-19.
Меѓу погодените превозници е и унгарскиот „Виз Ер“ кој најави дека во текот на летот ќе има намалување на летовите за околу 5%. Компанијата бележи пад на приходите, и првиот квартал од 2022 година го завршува во загуба од 285 милиони евра.
„Виз Ер“ во регионот има редовни летови од повеќе градови, вклучувајќи ги Скопје, Белград, Тирана, Приштина, Сараево и Љубљана. Според најавите најмалку шест директни линии од регионот ќе бидат укинати.
Летово нема да се реализираат планираните линии од Охрид до Дортмунд кои се враќаат наесен, потоа летовите од Белград до Билунд, нема да се лета на рутата Љубљана-Шарлроа, а најавени се редуцирани летови од Приштина и Тузла.
Голем број патници се потпираат на евтините летови претежно до популарни европски дестинации на аеродроми во близина на метрополите како Рим, Париз, Лондон. Исто така многу патници ги користат евтините летови до градови во кои има голема балканска миграција, на пример кон земји како Италија, Шведска, Германија и Швајцарија на кои има и редовни линии.
За патниците на кои ќе им бидат откажани летовите, од компанијата велат дека ќе ги известат навреме и ќе им понудат нов термин или враќање на средствата.
Намалениот број летови се должи пред се на бројните штрајкови на аеродромските работници во земји како Велика Британија и Унгарија и недостигот на работна сила. Авиокомпаниите како „Виз Ер“ најавиja зголемување на цените на билетите за да се носат со поскапувањата на горивата.
Од друга страна вработените во авиоиндустријата бараат поголеми плати за да може да ги поднесат поскапувањата како резултат на високата инфлација во Европа.
Проблемот со аеродромите во Велика Британија ќе биде решаван со поддршка на државата за регрутирање на персонал и справување со огромните редици за чекање багаж бидејќи нема доволно кадар кој работи на товарење и други сервисни услуги.
Со оглед на зголемениот интерес за патување во текот на летото по справувањето со Омикрон варијантата на корона-вирусот и укинувањето на рестриктивните мерки за движење на патници, авионската индустрија ќе преземе мерки за надминување на проблемите, а повеќе авиокомпании очекуваат раст на приходите и заработката во претстојните месеци.
