Стотици летови се откажани на главните германски аеродроми откако персоналот задолжен за безбедноста започна целосен штрајк поради тековниот спор за покачување на платите.
Со штрајкот беа приземјени повеќе од 1.100 летови на 11 аеродроми, вклучително и најпрометниот меѓународен аеродром во земјата во Франкфурт, а последиците ги осетија над 200.000 патници.
Аеродромот во Франкфурт соопшти дека штрајкот ќе предизвика големи прекини и откажувања на летовите во текот на денот, и ги советуваше патниците да не доаѓаат на аеродромот бидејќи безбедносните контролни пунктови се затворени.
„Ве молиме контактирајте со вашата авиокомпанија или патнички оператор за информации во врска со вашиот лет. За трансфер и поврзување на патниците, исто така, се очекуваат прекини и доцнења поради штрајкот“, се вели во соопштението на аеродромскиот оператор.
Откажани летови се очекуваат и на аеродромите во Хамбург, Бремен, Хановер, Берлин, Келн/Бон, Дизелдорф, Лајпциг/Хале, Дрезден, Ерфурт и Штутгарт.
Властите посочуваат дека персоналот за безбедност на аеродромите во Минхен и Нирнберг нема да се приклучи на акцијата за штрајк, но доцнењата и откажувањата на летовите сè уште се можни, поради прекините на летовите низ целата земја.
Синдикатот Ver.di го најави предупредувачкиот штрајк претходно оваа недела, откако третиот круг на колективни преговори со Федералната асоцијација на компании за воздухопловна безбедност (БДЛС) не даде резултат.
Синдикатот, кој претставува околу 25.000 вработени во секторот бара зголемување на платите од 2,80 евра на час, зголемени бонуси и повисоки стапки за прекувремена работа.
