Шпанската левичарска коалициска влада во вторникот одлучи да ја спречи саудиската телекомуникациска компанија СТЦ Груп да преземе мнозински удел во мултинационалната компанија Телефоника со седиште во Мадрид, нагласувајќи дека тоа е од стратешко значење.
Телефоника е шпански национален телекомуникациски оператор и една од најголемите телекомуникациски компании во светот.
Со гореспоменатата одлука, Владата побара и купување на 10 отсто од Телефоника од страна на Државната компанија за индустриско учество (СЕПИ), информирајќи ја и Националната комисија за пазар на хартии од вредност за нејзиниот потег.
Бидејќи сегашниот капитал на Телефоника е 20,5 милијарди евра, се очекува купувањето да биде еквивалентно на 2,05 милијарди евра.
СЕПИ нагласи дека Телефоника е водечка компанија во областа на телекомуникациите и во Шпанија и на меѓународно ниво, додавајќи дека оваа компанија „е од витално значење за економијата, производната структура, истражувањето, безбедноста, одбраната, и на крајот, за благосостојбата на граѓаните“.
Иако Телефоника беше приватизирана во 1997 година, сегашната аквизиција ќе ја врати на шпанската држава.
Саудиската групација СТЦ во септември објави дека купила 9,9 отсто од Телефоника за 2,1 милијарди евра.
Шпанската влада се спротивстави на саудиската компанија да стане најголем акционер на Телефоника, тврдејќи дека таа е национално стратешка компанија.
Министерката за економија Надија Калвино по седницата на Владата изјави дека купувањето „овозможува учество на државата во големи стратешки телекомуникациски проекти“, наведувајќи дека е „компатибилно“ со слични акции на други големи европски земји како Франција и Германија.
