Сѐ почестата заборавеност може да биде само знак за стареење, но може да биде и сигнал за почетната фаза на деменција, па затоа е важно правилно да се интерпретираат симптомите.
Ако забележите дека вашиот партнер, постар родител или брат или сестра имаат проблеми со меморијата и краткорочната меморија, може да се загрижите дека ова е знак за рана деменција, но честото заборавање на имиња или зборови не е секогаш причина за вознемиреност, според експерти.
„Но ако некој често ги заборава термините и лекарските прегледи, ги повторува работите што штотуку ги кажал и почне да го губи чувството за движење и ориентација во просторот, членовите на семејството треба да обрнат внимание на тоа“, изјави Марион Лангхорст, консултант во Германското здружение за Алцхајмерова болест.
Доколку овие симптоми се придружени со промени во однесувањето, промени на личноста и повлекување од социјалната средина, Лангорст предупредува дека зад тоа може да стои деменција.
Повеќе од 55 милиони луѓе во светот страдаат од деменција, а Алцхајмеровата болест, најчеста форма на деменција, е одговорна за 60 до 70 проценти од сите случаи.
„Деменцијата е термин кој експертите го користат за да опишат одредени симптоми кои се појавуваат во секојдневниот живот, а Алцхајмеровата е болест која особено често води до овие симптоми. Значи, не секој што страда од деменција има Алцхајмерова болест, прогресивно невролошко нарушување што предизвикува мозочните клетки да умираат и мозокот да се намалува“, објасни Лангхорст.
Ставањето на нештата на погрешно место, на пример ставање чаши во фрижидер или шише млеко во када, е еден од знаците на деменција, но исклучително е важно да се истражат причините за таквото однесување.
„Може да биде последица и на хормонални промени, тешка депресија - т.н псевдодеменција - последици од ефектите на лекови, дехидрација или променет притисок на церебралната спинална течност. И многу од овие проблеми може да се третираат ако причината е правилно дијагностицирана“, тврди Лангхорст.
Таа, исто така, предупредува дека многу луѓе со симптоми на можна деменција, стравувајќи од губење на независноста, не сакаат да одат на лекар.
„Дијагнозата на деменција, сепак, не значи дека автоматски сте неспособни за работа“, истакнува Лангхорст.
