Повеќе од 370 милиони девојчиња и жени, кои и денес се живи, биле жртви на сексуално насилство пред да наполнат 18 години, соопшти денеска Детскиот фонд на ОН (УНИЦЕФ).
„Повеќе од 370 милиони девојчиња и жени кои живеат денес, или една од осум, биле жртви на силување или сексуален напад пред да станат полнолетни“, се наведува во соопштението на УНИЦЕФ објавено по повод 11 Октомври, Меѓународниот ден на девојчињата.
Ако се избројат и случаите на „неконтактни“ форми на сексуално насилство, како насилство на интернет и вербално вознемирување, тогаш таа бројка е 650 милиони, односно секоја петта жена била злоставувана.
Според извршната директорка на УНИЦЕФ Кетрин Расел, сексуалното насилство врз децата е дамка на нашата морална совест.
„Тоа предизвикува длабока и трајна траума, често од некој што детето го познава и има доверба, на места каде што треба да се чувствува безбедно“, рече таа, додавајќи дека сме сведоци на страшно сексуално насилство во конфликтните зони, каде што силувањата и насилството врз родова често се користат како оружје во војната.
„Преживеаните често ја носат траумата од сексуално насилство во зрелоста, соочени со поголеми ризици од сексуално преносливи болести, злоупотреба на супстанции, социјална изолација и проблеми со менталното здравје како што се анксиозност и депресија, како и предизвици во формирањето здрави врски. Доказите покажуваат дека влијанието дополнително се влошува кога децата го одложуваат откривањето на нивните искуства, понекогаш на долги периоди, или целосно ја чуваат злоупотребата во тајност“, се наведува во соопштението.
Најголем број жртви е регистриран во субсахарска Африка, каде што бројот на жени и девојки жртви на сексуално насилство е 79 милиони, во Источна и Југоисточна Азија 75 милиони, во Централна и Јужна Азија 73 милиони, во Европа и Северна Америка 68 милиони, во Латинска Америка и на Карибите 45 милиони, 29 милиони во Северна Африка и Западна Азија и шест милиони во Океанија.
Во исто време, се проценува дека секое 11-то момче или маж бил жртва на сексуална злоупотреба како дете, или меѓу 240 и 310 милиони во светот. Ако се вклучат и „бесконтактни облици на вознемирување“, тогаш таа бројка се движи од 410 до 530 милиони.
Меѓународниот ден на девојчето е меѓународен празник прогласен од Обединетите нации.
Првиот ден на девојчињата беше прославен на 11 октомври во 2012 година со желба да им се овозможи на девојчињата да имаат повеќе избор и да се зголеми свеста за родовата нееднаквост со која се соочуваат девојчињата ширум светот врз основа на нивниот пол.
