Социјалните мрежи можат да имаат „исклучително штетен ефект“ на менталното здравје на децата и адолесцентите, предупредува главниот американски лекар, повикувајќи ги технолошките гиганти на акција.
„Поминуваме низ национална криза на менталното здравје на младите и се плашам дека социјалните медиуми се главен двигател на оваа криза - нешто на што мораме итно да одговориме - предупредува Вивек Мурти во неодамнешното соопштение проследено со извештајот. Потребни се повеќе истражувања за „подобро да се разберат ефектите на социјалните мрежи“ врз младите луѓе, но „многу докази“ одат во прилог на тоа дека можат да имаат негативни последици, вели тој во извештајот кој содржи 19 страници.
Истражувањата утврдија врска помеѓу користењето на социјалните мрежи и појавата на депресивни симптоми. Со принудување на тинејџерите да се споредуваат, овие платформи можат да ја ослабат нивната самодоверба, според Вивек Мурти.
Младите девојки се поранливи од момчињата. Користењето на овие платформи ги изложува повеќе од момчињата на сајбер малтретирање или дури и развој на нарушувања во исхраната, според истражувањето што го цитираше Вивек Мурти. „Сите млади исто така можат да бидат изложени на опасни содржини“, вели тој.
Технолошките компании треба да спроведат „минимална возраст“ за децата кои сакаат да се приклучат на нивните социјални мрежи и да создадат стандардни поставки кои подобро ја штитат нивната приватност, нагласи Мурти.
До 95 отсто од младите Американци на возраст од 13 до 17 години велат дека користат социјална мрежа, а една третина ја користат „речиси постојано“, според Истражувачкиот центар Пју. Социјалните мрежи и нивото влијание врз младите се предмет на загриженост во САД.
Монтана неодамна донесе закон за забрана на апликацијата TikTok следната година, со што стана првата американска држава што го стори тоа.
Покрај проблемите со податоците и дезинформациите, локалните власти ја критикуваа и платформата дека има штетно влијание врз менталното здравје на најмладите.
Во март, Јута донесе закон со кој се бара социјалните мрежи да добијат родителска согласност пред да им дозволат на малолетниците пристап до нивните платформи.
