Босна и Херцеговина благодарение на европската перцепција за земјата од Западен Балкан, нема во скоро време да стане членка на Европската Унија, смета аналитичарот Адмир Лисица.
„Искрено верувам дека уште долго БиХ нема да стане членка на ЕУ и една од причините е актуелната европска перцепција“, вели Лисица кој се бави со истражувања, меѓународна политика и прашања за дијаспората.
„Мислам дека кандидатскиот статус е позитивен, но не го доживувам еуфорично освен ако одредени членки на ЕУ не направат сериозен исчекор во нивните политики кон Босна и Херцеговина“, додава тој.
Откако Европскиот Совет и додели кандидатски статус за членство во ЕУ, Лисица смета дека главен приоритет на БиХ треба да биде зачленувањето во воениот сојуз НАТО.
„Влегувањето во НАТО ќе внесе чувство на безбедност за граѓаните, но исто така и за странските инвеститори. Иако гледаме од искуството на пример на Црна Гора дека дури и членството во НАТО не гарантира целосна политичка и безбедносна стабилност“, оценува Лисица.
„БиХ е посветена на членството во НАТО и ЕУ, кои се главни аспирации за мнозинството граѓани. Ова се позитивни сигнали, но ние не смееме да бидеме еуфорични. Долг е патот до полноправно членство“, дополнува тој.
Европа ѝ е „должник“ на Босна и Херцеговина
Лисица смета дека Европа ѝ е „должник“ на Босна и Херцеговина за сè што се случуваше во 90-те години.
Според Лисица босанските власти треба овој статус да го искористат како поттик за воведување неопходни реформи за членство во ЕУ.
„Ова се неопходни реформи и тука нема ништо спорно. Политичките претставници мора да најдат начин да ги спроведат сите точки на кои инсистира ЕУ, и сите реформи се во интерес на граѓаните на Бих“, вели Лисица.
Тој има надеж дека возможен е напредок и дека реформите ќе се спроведат во разумни рокови.
Запрашан дали одлуката на ЕУ ќе ги охрабри младите луѓе да не мигрираат кон западноевропските земји, смета дека и соседна Хрватска стана членка на Унијата но, тоа не ги спречи младите да се иселуваат.
„Младите се стремат кон соодветни услови за живот и ако не можат да ги најдат во сопствената земја, а некоја друга држава им ги понуди, ќе си заминат без разлика на се. Повторно потенцирам, Хрватска е членка на ЕУ, па нејзините жители масовно си заминуваат, а има и други слични примери во рамките на ЕУ. Сигурно е дека одреден број млади ќе го сменат ставот во контекст на иселувањето, но не во поголема мера“, рече Лисица.
Младите убедени дека иселувањето ќе продолжи
Младите луѓе во Босна и Херцеговина, од каде илјадници луѓе имигрираат во Западна Европа од економски причини, сметаат дека иселувањето од нивната земја ќе продолжи дури и откако таа ќе стане кандидат за ЕУ.
Ифета Неимарлија, студентка на Меѓународниот универзитет во Сараево (МУС), вели дека кандидатскиот статус на Босна и Херцеговина нема да го спречи „најголемиот проблем во земјата“, миграцијата на младите.
„Приклучувањето во ЕУ ќе има и позитивни и негативни ефекти за Босна и Херцеговина. Со членството во ЕУ ќе се подобрат стандардот и економијата. Од друга страна, верувам дека ќе има и негативни ефекти за мојата држава, како што ќе се приближуваме до западните вредности и ќе се оддалечуваме од вредностите кои се карактеристични за нас“, вели Неимарлија.
Мервиша Халиловиќ-Алихоџиќ, друга студентка на МУС, вели дека е меѓу оние кои сметаат дека кандидатскиот статус за ЕУ нема да има никакво влијание врз нејзината земја.
„Ние сме единствените кои може да ја промениме моменталната ситуација во Босна и Херцеговина. Добивањето кандидатски статус нема да промени ништо. Ова е процес кој трае долго време и бара голем напор“, рече таа.
„Мислам дека повеќе ќе постигнеме ние самите. Дури и сега, младите избираат да живеат во странство. Верувам дека ако нашата земја стане членка на ЕУ, повеќе луѓе ќе ја напуштат земјата“, додаде таа.
Босна и Херцеговина, која аплицираше за членство во ЕУ пред околу седум години, неодамна го направи првиот чекор на долгиот пат стекнувајќи се со статусот земја кандидат.
Статусот потенцијален кандидат го стекна на Самитот на Европскиот Совет во 2003 година кој се одржа во Солун, Грција.
Официјално за влез во Унијата поднесе кандидатура во 2016 година.
Откако една земја ќе добие статус на кандидат, преговорите за пристап започнуваат во фази, под услов да се исполнат условите.
За почеток на преговорите за пристап може да бидат потребни години.
Од регионот на Западен Балкан, Словенија во 2007 година и Хрватска во 2013 година станаа членки на ЕУ, додека со кандидатски статус Северна Македонија се стекна во 2005 година, Црна Гора во 2010 година, Србија во 2012 година и Албанија во 2014 година.
Со поднесување на апликацијата на Косово за членство во ЕУ се очекува дека сите земји во регионот да продолжат да напредуваат со нивните надежи за влез во ЕУ.
