Во рамките на почетокот на воената вежба „Defender Europe 2023“, во Тирана беше организирана програма со учество на високи функционери, каде што беа изложени различни воени опреми.
Во рамките на почетокот на воената вежба „Defender Europe 2023“, во Албанија беше организирана програма во која учествуваа високи претставници и претставници на армијата на Албанија и армијата на Соединетите Американски Држави (САД), каде што беа изложени и различни воени опреми.
Во поздравниот говор на настанот одржан на плоштадот „Мајка Тереза“ во Тирана, претседателот на Албанија, Бајрам Бегај, рече дека вежбата „Defender Europe“ е родена како вежба за зголемување на одбранбените капацитети на Алијансата во случај на конфликт или закана.
„Со неправедната руска агресија во Украина, денешната геополитичка реалност е сосема поинаква од онаа од пред две години и безбедносната ситуација стана многу посложена. Овие промени имаат значителни ефекти дури и во нашиот кревок регион на Западен Балкан, каде што злонамерните актери што не споделуваат исти вредности со нас, се обидуваат да го прошират нивното влијание. Затоа, важноста на оваа обука денес е поконкретна од кога било и нејзиниот континуитет повеќе од неопходен“, нагласи тој.
Бегај истакна дека Албанија е посветена на својата мисија како стабилизирачки фактор на Балканот.
Премиерот на Албанија, Еди Рама, рече дека развојот на оваа вежба со присуство на мултинационални трупи, под водство на САД, истовремено е израз на големото единство и непоколебливата определба на целата евроатлантска заедница „по секоја цена да ги заштити вредностите и принципите врз кои се засновани и функционираат нашите општества“.
Министерот за одбрана на Албанија, Нико Пелеши, изрази надеж дека ваквите вежби ќе станат традиција што несомнено ќе послужи за одржување во подготвеност на вооружените сили, но и за зајакнување на интеракцијата и соработката меѓу сојузничките сили и НАТО во услови на најтешки ситуации и сценарија.
„Defender Europe 2023“ е мултинационална, повеќедимензионална вежба предводена од војската на САД, во која учествува елитен персонал од армиите на 26 пријателски и сојузнички земји, а меѓу нив, со високо достоинство и професионализам, е застапен и воениот персонал на земјите на Западен Балкан. Вооружените сили на Република Албанија се важен дел од оваа вежба“, додаде Пелеши.
Началникот на Генералштабот на американските вооружени сили за Европа и Африка, Мајкл Викман, рече дека со нетрпение очекуваат и во иднина да продолжи ангажманот со Албанија за зајакнување на партнерството и пријателството што, според него, придонесува за глобалниот мир и безбедност.
„Би сакал да ја искористам оваа прилика да ѝ се заблагодарам на Албанија за нејзината импресивна посветеност на глобалниот мир и безбедност. Албанија е сојузник на НАТО и извонреден партнер за мир и регионално и глобално“, нагласи Викман.
Поздравен говор имаа и началникот на Генералштабот на вооружените сили на Албанија, бригаден генерал Арбен Кинѓи, и американската амбасадорка во Албанија, Јуриј Ким.
Во активноста беа изложени различни воени опреми на албанската и американската армија, привлекувајќи го интересот на граѓаните.
Вежбата „Defender Europe 2023“ предводена од Европската команда на САД започнува на 22 мај, а се очекува да заврши на 2 јуни, а дел од неа ќе бидат илјадници мултинационални војници, на територијата на неколку европски земји, меѓу кои и Албанија.
Заедничката мултинационална вежба е дизајнирана, според организаторите, да изгради подготвеност и интероперабилност меѓу сојузниците и партнерите на НАТО.
