Основниот кривичен суд Скопје на барање на Основното јавно обвинителство за гонење на организиран криминал и корупција им одреди мерка притвор од по 30 дена на четворицата осомничени за тероризам кои сакале да извршат напади на цивилни и јавни објекти.
Од Обвинителството денеска информираа дека по неколкумесечна предистражна постапка во текот на вчерашниот ден во соработка со МВР е спроведена акција во струшкиот и гостиварскиот регион. Притоа се приведени три лица од Гостивар и едно лице од Струга за кои постои основано сомнение дека сториле кривично дело Терористичка организација од чл.394-а од КЗ.
„Првоосомничениот, дваесет и едногодишен гостиварец, на почетокот на оваа година, создал и активно координирал терористичка организација/ ќелија, во која членуваат останатите осомничени и други НН лица од државата и од странство. Организацијата со основи на идеолошката матрица на познатата терористичка организација ДАЕШ имала намера на изведување на терористички акт на цивилни – меки цели и јавни објекти“, рекоа од ОЈО.
Според обвинителството, првосомничениот во почетокот на 2024 година формирал повеќе групи на социјалната мрежа Телеграм каде искажувал целосна подготвеност и намера за извршување на терористички напад, како и поттикнување на други лица за извршување на терористички напади во Европа.
„Во групите споделувал претходно набавен и преработен- преведен пропаганден материјал на ДАЕШ, регрутирајќи нови членови, правејќи обиди за набавка на огнено оружје, како и споделувајќи упатства за изработка на импровизирани експлозивни направи кои што потоа ќе бидат искористени за извршување на терористички напади, рекоа од ОЈО.
Со оглед на кривичното дело што им се става на товар, околностите, како и фактот дека се исполнети условите за определување на мерката притвор, јавниот обвинител на судијата на претходна постапка при Основен кривичен суд Скопје денеска му предложи на осомничените да им биде определена мерка притвор во траење од 30 дена.
Од Судот информираа дека притворот е одреден бидејќи постои опасност осомничените да се дадат во бегство и да ја попречат истрагата со влијание на сведоци.
