Моментумот што го постигнавме со Хрватска во последните години во однос на економската соработка е ветувачки, рече претседателот на Република Туркије, Реџеп Таип Ердоган, во своето обраќање на хрватско-турскиот бизнис форум што се одржа во Загреб.
Ердоган денеска ја посети Хрватска, каде претходно имаше средба со претседателот на Република Хрватска, Зоран Милановиќ, а потоа свечено ги отвори џамијата и Исламскиот културен центар во Сисак.
„Утрово имав средба со претседателот на Хрватска, а потоа имавме средба на делегации. Разговаравме и за нашите трговски односи. Верувам дека одлуките што ги донесовме ќе придонесат за зајакнување на соработката и пријателството меѓу нашите земји. Моментумот што го постигнавме во последните години во однос на економската соработка е ветувачки“, рече Ердоган во своето обраќање на Бизнис форумот, на кој присуствуваше и претседателот Милановиќ.
Тој потсети дека трговската размена меѓу двете земји е зголемена два и пол пати од неговата претходна посета на Хрватска во 2016 година.
„На крајот на 2015 година нашата трговска размена изнесуваше 387 милиони долари, а на крајот на 2021 година достигна 900 милиони долари. За време на таа посета поставивме цел за пет години да го зголемиме обемот на трговската размена на една милијарда долари, но не успеавме поради пандемијата, но верувам дека оваа година лесно ќе ја достигнеме таа цел“, рече турскиот лидер.
Тој додаде дека сега краткорочната цел на обемот на трговија е две милијарди долари, а среднорочната и долгорочната пет милијарди долари.
Тој истакна дека турските компании инвестираат во бројни сектори во Хрватска, пред се во енергетиката, градежништвото, инфраструктурата, туризмот и банкарството.
„Сигурен сум дека овој бизнис форум ќе биде дополнителен поттик кој ќе го зголеми моментумот во нашите економски и трговски односи. Ние државниците сме решени и да ги отстраниме бирократските пречки со кои се соочува бизнис светот, а зависи од вас, луѓето во деловниот свет, да придонесе за зајакнување на економските врски на нашите земји“, рече Ердоган.
Говорејќи за турската економија, Ердоган рече дека во 2020 година, кога глобалната економија падна за 3,4 отсто, Туркије оствари стапка на раст од 1,8 отсто.
„Во време кога светската економија се соочува со ризик од сериозен пад, забележавме стапка на раст од 7,5 отсто во првиот квартал од 2022 година и 7,6 отсто во вториот квартал. Заклучно со овој месец, нашиот извоз надмина 250 милијарди долари на годишно ниво“, рече Ердоган.
Тој се осврна и на наменската индустрија на неговата земја, нагласувајќи дека е постигнат голем успех на овој план.
„Благодарение на напредокот што го постигнавме на полето на технологијата за беспилотни летала, денес сме една од трите најуспешни земји во светот на ова поле“, рече Ердоган, додавајќи:
„Со нашето офанзивно борбено беспилотно летало Акинџи, ја подигнавме нашата флота од беспилотни летала на повисока лига.
Ердоган подвлече дека напредокот на неговата земја во оваа област е најдобар и најконкретен показател за силата на турската економија и довербата во Туркије.
Ердоган денеска ја посети Хрватска, што беше трета станица од неговата регионална турнеја, при што претходно ги посети Босна и Херцеговина и Србија.
