Европската унија соопшти дека е воспоставен Заеднички надзорен одбор за надгледување на спроведување на Договорот за патот на нормализација помеѓу Косово и Србија и Анексот за неговата имплементација.
Како што се наведува во соопштението, воспоставувањето се одвива 30 дена по состанокот на високо ниво на Дијалогот во Охрид, како што е наведено во Анексот за имплементацијата.
Со заедничкиот надзорен одбор ќе претседава специјалниот претставник на ЕУ за дијалогот на Белград и Приштина и други регионални прашања за Западен Балкан Мирослав Лајчак. Косово ќе го претставува неговиот амбасадор во Брисел Агрон Бајрами, а Србија ја претставува главниот преговарач Петар Петковиќ.
Комитетот редовно ќе се состанува во Брисел. Се очекува дека Проектната задача ќе биде финализирана и усвоена на првиот состанок на Комитетот, кој ќе се одржи по следниот состанок на високо ниво кој е закажан за 2 мај во Брисел.
