Грчките земјоделци решија да ги ескалираат протестите по неуспешната средба со премиерот Киријакос Мицотакис во Атина, објави во средата јавната телевизија ЕРТ.
„Со владата што изјавува дека нема повеќе фискален простор за бенефиции, земјоделците во моментов размислуваат за иднината на мобилизациите“, се вели во соопштението.
ЕРТ рече дека некои од фармерите предложиле деескалација, но повеќето се незадоволни од состанокот во вторникот и дале поддршка за маршот до Атина со трактори.
Одлуката ќе биде донесена во четврток во централниот град Лариса на состанокот на земјоделскиот блок од различни делови на земјата.
Владини претставници рекоа дека предлозите на премиерот се суштински и праведни со постојани мерки за трошоците за енергија, според ЕРТ.
Како што беше објавено по средбата, Мицотакис останал на ставот дека Владата сака да најде решенија за проблемите на кои укажаа земјоделците.
За да се постигне договор за трошоците за електрична енергија, Мицотакис рекол дека цената за киловат час ќе биде помала од 0,10 евра за земјоделците кои учествуваат во кооперативни шеми.
Премиерот рекол дека во следните осум години, една третина од потрошувачката на земјоделците ќе биде по цена од околу 0,09 евра за киловат час.
Мицотакис најави и авансно плаќање на повратот на Посебниот данок на потрошувачка на земјоделско гориво.
Земјоделците останале фрустрирани поради резултатите од состанокот.
Додека некои сметаат дека повратот од земјоделското гориво е недоволно, други тврдеа дека повеќето земјоделци нема да имаат право на намалена електрична енергија.
