Нема никакви пречки за членство на Косово во Советот на Европа, било констатирано на состанокот на Координативната група за членство на Косово во Советот на Европа, што се одржа денеска во Владата на Косово.
На средбата на косовските претставници задолжени за пристапниот процес на Косово, заменик министерот за надворешни работи и дијаспора на Косово, Крешник Ахмети, изјави дека од моментот кога барањето на Косово било доставено до Советот на Европа, процесот направил успешни чекори.
Тој изјави дека посетата на еминентни европски правници, кои требало да се уверат во усогласеноста на косовското законодавство со стандардите на Советот на Европа, го потврдила успехот на Косово на овој пат.
„Такво нешто потврди и финалниот извештај на еминентни правници, кој е веќе објавен и кој има за цел да се занимава со прашањето дали правниот систем на Косово е во согласност со стандардите на Советот на Европа. Потенцирајќи дека, освен што Косово ги исполнува стандардите на Советот на Европа, за многу прашања ги надминува и меѓународните стандарди. Ова е трета победа во текот на овој процес за членство, победа која покажува дека нема причина да се спротивставиме на полноправното членство на Република Косово во Советот на Европа или да го одложиме ова членство“, нагласи Ахмети.
Потпретседателката на Собранието на Косово, Саранда Богујевци, истакна дека парламентарната делегација на Косово за членство во Советот на Европа е единствена и ја сочинуваат претставници на сите пратенички групи.
„Како држава мислам дека направивме многу добри работи, почнувајќи од Уставот и законите што се на сила, сме во многу подобра позиција од многу земји членки на Советот на Европа. Не само во однос на сведочењето на еминентни правници, туку и во различни точки од дискусиите што се водат во рамките на Парламентарното собрание, се гледа дека сме во добра позиција како држава“, потенцира Богујевци.
Богујевци рече дека сликата за Косово е многу добра, но дека поради антилобистичките напори на Србија треба многу да се работи на лобирање кај пратениците на земјите-членки на Советот на Европа.
Вишиот советник Албулена Хасани изјави дека на 27 септември бил објавен извештај на еминентни правници во кој се нагласува дека нема никакви пречки за членство на Косово во Советот на Европа. Хасани изјави дека извештајот препорачува подобрување во областите на демократијата, владеењето на правото и човековите права, но не поставува никакви предуслови за членство.
Исто така, таа рече дека извештајот не го поставува прашањето за непризнавање на Косово од страна на некои земји, бидејќи тоа се одделни работи. Во мај годинава, по една година од официјалното барање за членство, Косово го прескокна првиот чекор на патот кон членство во Советот на Европа.
Кoмитетот на министри на оваа организација го поддржа барањето на Косово со 33 гласа, седум против и пет воздржани. Потоа, во јули годинава, Владата на Косово усвои предлог за формирање на Координативна група за членство на Косово во Советот на Европа.
Координативната група ќе игра важна улога во зголемувањето на соработката и внатрешната координација, како и во обезбедувањето попрецизен и покохерентен преглед на ситуацијата во Косово во однос на човековите права, владеењето на правото и демократијата.
