Премиерот на Косово, Албин Курти и високиот советник на американскиот Стејт департмент, Дерек Шоле, ја истакнаа потребата за интензивирање на напорите во чиј центар ќе биде целосната нормализација на односите меѓу Косово и Србија со заемно признавање.
Курти му се заблагодари на Шоле за посетата, за континуираната комуникација и за неговиот ангажман.
„Соединетите Американски Држави се незаменлив партнер и сојузник на Косово“, рече Курти, истакнувајќи дека целта на Косово е партнерството со САД дополнително да се зајакнува, како и интеграцијата во НАТО, соопшти Владата на Косово.
Меѓу другото, разговарано е и за процесот на дијалогот, европскиот план и односите меѓу Косово и Србија. Истакната е потребата од активен и конструктивен ангажман во дијалогот и интензивирање на напорите кон целосна нормализација на односите меѓу Косово и Србија со заемно признавање.
Шоле беше придружуван од американскиот специјален пратеник Габриел Ескобар; заменик-помошникот секретар за одбрана, за европска политика и НАТО, Спенсер Бојер; амбасадорот на Соединетите Американски Држави во Косово, Џефри Ховениер; шефицата на персоналот на советникот Шоле, Лаура Апдегроув; специјалниот помошник на советникот, Флоренс Акини и политичкиот и економски советник во Американската амбасада во Косово, Ралан Хил.
Шоле во Косово престојува во рамките на мини-турнејата низ регионот.
