Претседателот на Хрватска, Зоран Милановиќ, по гласањето на изборите за пратеници во хрватскиот Сабор изрази надеж дека излезноста на парламентарните избори што се одржуваат денеска во Хрватска ќе биде повисока од пред четири години.
Актуелната претседател е кандидат за премиер на Социјалдемократската партија (СДП), односно на коалицијата „Реки на правдата“.
„За жал, имате уште за краток мандат премиер, кој и денеска не одолеа да го наруши изборниот молк. Дивеење и зборување глупости за кршење на Уставот, почитување на Законот“, рече Милановиќ.
Тој посочи дека на овие избори очекува подобра излезност од минатиот пат.
„Последниот пат беше грозна. Во 2011 година излегоа 2,4 милиони луѓе, а потоа падна, пропаѓаше и заврши со очајна излезност која ги уништи сите прогнози и очекувања за 2020 година. Сега ќе видиме“, нагласи Милановиќ.
На прашањето каде ќе ги следи резултатите од изборите, Милановиќ рече дека никаде нема да ги следи бидејќи ќе има излезни анкети кои се релативно точни и не можат да направат многу грешки.
„Покажуваат приближно каква е состојбата на работите и очекувам разговори и договори со сите оние кои сакаат Хрватска во која нема крадење, нема грабеж, не се доведуваат граѓаните до лудило... Тоа ќе биде една од првите работи што ќе се сменат. Европските фондови повеќе ќе се користат, а нема да се крадат“, рече Милановиќ.
Тој потсети дека победи на претседателските избори пред повеќе од четири години.
„Тогаш не гласав на првите избори, за да одржам одредена независност, немав ништо со мојата поранешна партија, останав на страна и на локалните избори. Сега сум во оваа позиција, тоа е реакција на дивјаштвото“, додаде Милановиќ.
Во Хрватска гласачките места се отворени до 19 часот вечерва, каде повеќе од 3,7 милиони гласачи ќе одлучат кои претставници ќе ги претставуваат во следните четири години и кои ќе добијат шанса да формираат нова влада и да управуваат со земјата.
