Претседателката на Косово, Вјоса Османи изјави дека треба да им се даде одреден рок на граѓаните за да може без проблеми да се спроведе новата Регулатива на Централната банка на Косово, која предвидува укинување на употребата на српскиот динар на Косово.
Во Косово на 1 февруари ќе стапи на сила новата Регулатива на Централната банка за готовинско работење, според која ќе се користи само еврото. Според новата регулатива, другите валути може да се користат како вредност само за складирање во физичка форма или на банкарски сметки, за извршување на меѓународни плаќања и за девизни активности.
Оваа уредба предизвика негативни реакции кај косовските Срби, кои примаат исплати од Република Србија во динари, додека меѓународните дипломати од САД и ЕУ ја повикаа Владата на Косово да ја преиспита оваа одлука.
Претседателката Османи одговарајќи на новинарски прашања истакна дека според член 11 од Уставот на Косово, еврото е единствената валута во Косово.
„Во однос на примената на овие принципи во пракса, се разговара за низа опции со кои од една страна ќе се почитува членот 11 од Уставот, додека од друга страна ќе се овозможи одредено време граѓаните да бидат информирани и да се префрлат на нови сметки за да може Регулативата да се применува без никакви проблеми и со целосна поддршка од земјите сојузници“, рече Османи.
Таа посочи дека во овие два дена ќе има договор за имплементација на одлуката на Централната банка на терен, бидејќи, како што рече, може да поминат еден до два месеци одлуката целосно да се спроведе, а не да остане само на хартија.
Претседателот на Косово го спореди прашањето за забраната на српскиот динар со ситуацијата околу укинувањето на старите српски регистарски таблички на северот на Косово, кога сојузниците побараа од Владата на Косово да ја одложи одлуката за одредено време.
„Како што можете да видите, денес речиси сите граѓани кои живеат на север ги сменија регистарските таблички на Република Косово. Би рекол дека ова е сличен проблем, бидејќи прашањето за табличките беше и прашање на одбрана на суверенитетот и уставноста“, рече Османи.
Специјалниот претставник Мирослав Лајчак вчера во Приштина по средбата со премиерот Албин Курти изјави дека денеска ќе има повеќе информации за прашањето за користењето на динарот.
Амбасадите на земјите од групата „Квинта“ ги повикаа косовските власти во неделата да ја прекинат примената на Регулативата на Централната банка на Косово за забрана за користење на динарот во Косово од 1 февруари, за да се овозможи доволно долг преоден рок.
Амбасадите на Франција, Германија, Италија, Велика Британија и Соединетите Американски Држави, кои ја сочинуваат групата Квинта, во заедничко соопштение наведуваат дека новата Регулатива предизвикува загриженост во однос на влијанието, особено врз српската заедница.
Од крајот на војната во 1999 година, српскиот динар е во употреба на Косово, во областите каде живее мнозинско српско население, кое добива плати, пензии, социјална помош или други видови на надоместоци од буџетот на Република Србија.
Досега динарот се исплаќаше преку нелиценцирани експозитури на Пошта Србија во Косово и преку Комерцијална банка, која престана да работи на Косово на 1 февруари, откако неодамна беше купена од НЛБ банка.
