Патот на земјите од Западен Балкан кон членство во Европската Унија е предолг и самата Унија направи грешки на тоа поле, изјави претседателката на Република Словенија, Наташа Пирц Мусар во четвртокот во Сараево, каде пристигна во дводневна посета на Босна и Херцеговина.
Пирц Мусар попладнето со воени почести беше примена од претседавачот и членовите на Претседателството на Босна и Херцеговина Жељко Комшиќ, Жељка Цвијановиќ и Денис Беќировиќ со кои оствари средба, а потоа се сретнаа и делегациите на БиХ и Словенија.
Во фокусот на разговорите беа билатералните односи, економската соработка меѓу Босна и Херцеговина и Словенија, како и приближувањето на Босна и Херцеговина кон Европската унија, односно исполнувањето на условите за почеток на пристапните преговори во март, рече претседавачот на Претседателството на БиХ, Жељко Комшиќ.
„Би било многу лоша порака ако не добиеме отворање на преговорите. Треба да се грижиме за таа страна на паричката кога зборуваме за европскиот пат. Разговаравме за економските односи, политички тие се на навистина завидно ниво, разговаравме и за економската соработка. Економската размена е за нашите можности и големина на завидна основа и секако можеме да бидеме оптимисти дека соработката ќе продолжи на заемно задоволителен начин“, изјави Комшиќ по средбата.
Тој се заблагодари на Владата на Словенија за поддршката на БиХ и на се што е важно за мирот, стабилноста, безбедноста и напредокот на БиХ.
Словенечката претседателка Наташа Пирц Мусар го изрази своето задоволство што го посетила Сараево на 40-годишнината од Зимските олимписки игри 1984 година во Сараево.
„Тоа беше успехот на сите републики од поранешната држава“, рече словенечката претседателка на почетокот на своето обраќање.
Таа рече дека Словенија и БиХ се историски поврзани и дека пријателството меѓу двете земји не е променето.
„Никој не може да ни го одземе пријателството и убедена сум дека тоа ќе трае долго. Словенија е ваш голем пријател, сојузник. Словенија беше една од земјите кои го поддржаа патот на Босна и Херцеговина кон ЕУ. Разговаравме со многу земји, а тоа го постигнавме за на 21 март во Брисел повторно да разговараме за БиХ и евентуалниот почеток на преговорите“, рече словенечкиот претседател.
Таа додаде дека сите 27 земји-членки на ЕУ мора да го направат својот дел дотогаш.
„ЕУ направи свои грешки на тој пат. Патот на земјите од Западен Балкан е многу предолг, според мене. Ние како ЕУ мора да се погледнеме во огледало и во следните недели да направиме сѐ за да и дадеме на Босна и Херцеговина можност за почеток на претстојните преговори“, рече Пирц Мусар.
Таа додаде дека Словенија ќе продолжи да и помага на Босна и Херцеговина на тој пат и дека оваа земја заслужува членство во ЕУ.
„Тоа е природна географска карактеристика на вашата земја. Вие припаѓате на Европската унија“, рече словенечката претседателка.
Таа потсети дека Словенија годинава слави 20 години од членството во ЕУ и дека изминативе две децении покажаа колку членството во Унијата всушност и донесе корист на таа земја и зголемувањето на нејзиниот бруто домашен производ.
„Внатре во ЕУ често не е лесно да се усогласат интересите на 27 земји-членки. Но мораме да запомниме, политиката е уметност на правење компромиси. Ако е тешко да се прават компромиси во рамките на 27 земји-членки и толку многу различни интереси, јас се осмелувам да кажам дека за овие три народи треба да биде полесно. Ги поздравувам заклучоците од денешната средба на лидерите на политичките партии на БиХ дека усогласиле 90 отсто од отворените прашања. Работата не завршува тука, ниту на ваша страна ниту на нашата. Посакувам 21 март во Брисел да биде радосен ден за БиХ и Босна во блиска иднина да стане „Тим Европа'“, рече Мусар.
Таа потсети дека во јуни се одржуваат избори во Европската унија и предупреди дека политичката слика во Европа може да се промени.
„Апелирам до сите нас, да го искористиме моментот и да направиме сѐ за БиХ да ги исполни сите минимални услови за зелено светло да се даде на 21 март“, рече Пирц Мусар.
Како што е најавено, Пирц Мусар ќе ги посети и припадниците на 48-от контингент на словенечката армија, кои дејствуваат во рамките на воената мисија ЕУФОР Алтеа и седиштето на НАТО во Сараево.
Предвидена е и средба со претседателката на Советот на министри на Босна и Херцеговина, Борјана Кришто и претставници на двата дома на Парламентарното собрание на Босна и Херцеговина.
Во рамки на посетата на Босна и Херцеговина, претседателката на Словенија ќе учествува и на свечената академија по повод 40-годишнината од Зимските олимписки игри во Сараево.
Пирц Мусар во петок ќе присуствува на манифестацијата „ДипломатСКИ“ во организација на Амбасадата на Словенија во Босна и Херцеговина, кога свечено ќе биде отворена нова скијачка патека во чест на легендарниот скијач и сребрен олимписки медал - Словенецот Јуре Франко.
