Сите државјани на Косово што живеат во странство, а кои се пријавиле за гласање надвор од земјата преку пошта, од денес до 8 февруари имаат можност да гласаат за редовните парламентарни избори.
Централната изборна комисија (ЦИК) преку известување информира дека започна периодот на гласање преку пошта за сите државјани на Косово што го избрале овој начин на гласање.
Според соопштението на ЦИК, периодот од 9 јануари до 8 февруари ќе важи само за граѓаните што успешно се пријавиле како гласачи надвор од Косово и кои гласачкото ливче го пратиле преку пошта до специјалните поштенски сандачиња.
Во меѓувреме, оние што се пријавени за физичко гласање во едно од дипломатските претставништва на Република Косово се известуваат дека гласањето ќе се одржи на 8 февруари 2025 година.
Редовните парламентарни избори во Република Косово ќе се одржат на 9 февруари, а официјално изборната кампања започнува на 11 јануари.
Според одлуките на ЦИК, за учество на изборите се сертифицирани вкупно 28 политички субјекти, со вкупно 1.280 кандидати што ќе се натпреваруваат за 120 пратенички места во Собранието на Косово.
