Вишото јавно обвинителство во Смедерево поднесе обвинителен акт против Урош Блажиќ (21) поради сомнение дека на 4 мај во селата Мало Орашје и Дубона уби 9 и повреди 12 лица.
На Блажиќ му се заканува затворска казна од 20 години за кривично дело тешко убиство. Во обвинението се опфатени неговиот татко Радиша Б., како и неговите братучеди Горан и Борис Г. од Крагуевац.
Блажиќ се товари дека сторил кривично дело тешко убиство, недозволено изработување, држење, носење и тргување со оружје и распрскувачки материи и неовластено користење туѓо возило.
Според обвинението, убиецот на 4 мај во селата Мало Орашје кај Смедерево и Дубон кај Младеновац пукал со автоматска пушка и пиштол и убил девет лица, од кои двајца малолетни, и се обидел да им ги одземе животите на уште 20 лица, од кои 12 ранил.
„Врз основа на прибраните докази во истрагата, постои основано сомнение дека Урош Б. на 04.05.2023 година околу 22.20 часот управувајќи автомобил „мерцедес“ во кој носел автоматска пушка „калашников“ со механички изваден фабрички број, пиштол марка „Токарев“ ТТ-33, со неколку куршуми за автоматска пушка и пиштол, една рачна бомба М 52, една рачна бомба М 75 и една кумулативна рачна бомба М79, дошол на Спомен-обележјето „Паднати борци“ во село Мало Орашје. Таму забележал група млади луѓе како се дружат и слушаат музика, по што без повод и причина излегол од возилото со намера ги убил, а со рафал од автоматска пушка испукал десетици проектили во нив. Откако го испразнал шаржерот со муниција, го заменил и продолжил да пука кон повредените, од кои некои веќе биле погодени и паднати на земја, при што на самото место загинал М.М., додека од повредите во здравствените установи починале Н.С., Л.М., П.М. и малолетната Н.М. и А.М., сите од Мало Орашје“, наведуваат од Обвинителството.
Потоа обвинетиот со „мерцедесот“ се упатил кон основното училиште „Момчило Живојиновиќ“, каде го запрел возилото, влегол во училишниот двор и почнал да пука со „калашниковот“ кон неколку лица кои таму меѓусебно се дружеле.
„Потоа пак од непосредна близина ги застрелал повредените лица, кои веќе биле погодени и паднати на земја, при што на самото место ги убил М.П. и К.П., кои се брат и сестра, додека Д.Т. починал набргу од здобиените рани. Урош Б. ранил и нанел тешки телесни повреди опасни по живот на уште четворица повредени, а испукал и неколку проектили во правец на уште 4 повредени, но ги промашил“, велат од обвинителството.
Понатаму, како што е утврдено во истрагата, Блажиќ бегајќи во село Шепшин забележал паркиран автомобил со клуч во бравата по што го придвижил и се упатил во близина на наплатната рампа во Мали Пожаревац.
Таму го оставил возилото и со себе зел две рачни бомби, а потоа се доближил до такси возило кое чекало на наплатната рампа. Тогаш со закана дека ќе ги активира бомбите го принудил таксистот да продолжи да вози со цел да ги избегнат полицајците службеници, додека внатре била патничка.
Од таму продолжиле кон место во општина Уб, каде од возилото излегла девојката на која ѝ се заканил да не пријави ништо.
Потоа му наредил на таксистот во утринските часови да го однесе во село Вињиште, кај Крагуевац, каде подоцна бил пронајден и лишен од слобода од полициски службеници“, наведува обвинителството.
