Албанскиот Специјален суд за корупција и организиран криминал (ЃККО) соопшти дека е продолжен притворот на градоначалникот на Тирана, Ерион Велиај, кој беше уапсен на 10 февруари.
Велиај, чија оставка долго време бараа граѓаните за време на протестите поради обвиненијата за корупција, беше предмет на судско рочиште кое траеше неколку часа.
Од ЃККО потврдија дека притворот е продолжен, но не прецизираа колку ќе трае.
Во меѓувреме, судот одлучи мерката куќен притвор за сопругата на Велиај, Ајола Ксоса да ја претвори во забрана за напуштање на државата со задолжителна судска контрола.
Во рамки на истрагата, еден бизнисмен е приведен, а неколкумина се ставени под судски надзор.
Против решението на ЃККО може да се поднесе жалба до Специјалниот апелациски суд за корупција и организиран криминал (ЃПАККО).
Пред почетокот на судската седница, десетици граѓани се собраа пред ЃККО за да му дадат поддршка на Велиај.
Велиај беше приведен на 10. февруари под обвинение за корупција и перење пари, додека неговата сопруга Ајола Ксоса беше ставена во домашен притвор под обвинение за корупција, перење пари и давање лажни пријави за нејзиниот имот.
Протестите против Велиај, чија оставка се бараше поради обвинувања за корупција, започнаа во април 2024 година, со повремени судири меѓу демонстрантите и полицијата.
Избран за градоначалник на Тирана на предлог на владејачката партија, Социјалистичката партија на Албанија, предводена од премиерот Еди Рама, Велиај ја извршува функцијата градоначалник на Тирана од 2015 година.
