Албанскиот премиер Еди Рама денеска најави дека на 12 мај ќе пристигне во Атина, каде ќе се сретне со албанската дијаспора, откако доби одобрение од грчките власти.
Неговата посета на Грција беше доведена во прашање по апсењето на градоначалникот на Химара Фреди Белери за наводно купување гласови.
И грчката опозиција се спротивстави на посетата на албанскиот премиер, но Рама доби дозвола од грчкиот премиер Киријакос Мицотакис.
Мицотакис посочи дека Грција е демократска земја во која странските лидери имаат право да одржуваат средби со своите сонародници, но додаде дека посетата на Рама била непотребна, пренесуваат албанските медиуми.
Грчкиот лидер престојот на Рама го окарактеризира како посета во рамките на средбата со Албанците во Грција, која не е поврзана со апсењето на Белери или претстојните избори за Европскиот парламент.
„Многу е изненадувачки да се слушнат изјавите на грчката опозиција и целосно ја разбирам перспективата што ја изрази грчкиот премиер. Остриот контраст во ставовите за истото прашање расветлува зошто едни се во опозиција, а на други им е доверено управувањето од народот“, објави Рама на Х.
Тој сподели информации за местото и времето на средбата и ги покани Албанците во Атина да присуствуваат.
