Романските авиони „Спартан“ и „Херкул“, кои како дел од меѓународната помош се испратени во Македонија, слетаа на скопскиот аеродром и веќе ги добија своите работни задачи за гаснење на пожар во Македонија.
Сериозни пожари за кои најверојатно ќе биде биде потребна воздушна поддршка има и на териториите на општините Чашка, Долнени, Студеничани, Зелениково и под Солунска глава.
„Бидејќи пожарот под Солунска глава се одвива на исклучително тешко пристапен, а на поголем дел и непристапен терен ќе биде упатен романскиот „Спартан“ кој ќе фрли во еден налет пет тони вода, по што ќе биде одлучено како ќе се постапи понатаму. Карактеристично за „Спартан“ е тоа што на местото каде ги фрла таканаречените водни бомби, не смее на има луѓе на земја, бидејќи водните бомби претставуваат опасност за нив, изјави директорот на ЦУК, Стојанче Ангелов.
Според Ангелов, српскиот хеликоптер Камов К-32, кој исто има капацитет од пет тони, утрово бил упатен заедно со турскиот „Блек Хок“ кон Ново Село во близина на бугарската граница, но потоа бил преупатен кон Радовиш, каде во близина на градот гори борова шума.
Во моментов нема опасност по ниту едно населено место, а целата состојба е под контрола.
Вкупно седумнаест воздухоплови во моментов се на располагање за гаснење на пожарите во земјава- трите „Ер трактори“ на Дирекцијата за заштита и спасување (ДЗС), двата турски „Ер -трактори“, два полициски и два армиски хеликоптери, два словенечки и по еден противпожарен хеликоптер од Туркије, Црна Гора и Србија, како и еден хрватски и два романски авиони.
