Земјотрес со јачина од 5,2 степени ја погоди Хрватска, соопшти Европско-медитеранскиот сеизмолошки центар.
Земјотресот е регистриран на 26 километри од Госпиќ, 119 километри од Сплит и 14 километри од Поседарје. Се случил на длабочина од десет километри.
Силно се почувствува во околината на Задар, околу Поседарје и во делот на Лика.
Граѓаните пријавиле дека земјотресот бил толку силен што избегале од своите куќи.
„И во Шибеник имаше многу тресење“, вели еден хрватски државјанин.
Земјотресот е почувствуван и во Босна и Херцеговина, најмногу во областа на Бихаќ, Босанска Крупа, Приједор и Бања Лука, а некои граѓани јавуваат дека почувствувале тресење на тлото и во Зеница, Мостар и Сараево.
Неколку минути по првиот, во Хрватска е забележан втор земјотрес со јачина од 2,5 степени. Регистриран е на 87 километри од Сплит на длабочина од 15 километри.
