Американскиот глобален производител на електрични автомобили Тесла следната година ќе почне да користи хуманоидни роботи, изјави во понеделник извршниот директор Илон Маск.
„Тесла ќе има навистина корисни хуманоидни роботи во ниско производство за внатрешна употреба на Тесла следната година и се надеваме за високо производство за други компании во 2026 година“, напиша Маск на платформата X.
Хуманоидниот робот на Тесла по име Оптимус првпат беше претставен во септември 2022 година, кој тогаш беше наречен Бумбар.
Минатата година компанијата го претстави Оптимус Ген 2 како нова генерација на својот хуманоиден робот.
Маск претходно оваа година изјави дека верува оти Оптимус ќе се користи за извршување на реални задачи во фабриките на Тесла до крајот на оваа година.
Додека Тесла има за цел да користи хуманоидни роботи за извршување на повторливи и опасни задачи во фабриките, американските потрошувачи на крајот би можеле да ги користат за комерцијални цели во своите домови, велат експертите.
