Калифорниската компанија за развој на вештачка интелигенција Опен АИ (Open AI) планира во јануари следната година да претстави нов производ наречен Оператор (Operator), кој ќе може да извршува различни задачи на компјутерот без интервенција на корисникот, пренесува Блумберг, цитирајќи два упатени извори.
Како што е наведено, производот базиран на вештачка интелигенција ќе може, меѓу другото, да напише код или да резервира патување.
Оператор припаѓа на таканаречените интелигентни агенти (AИ агенти), односно програми кои можат да извршуваат задачи во име на корисникот, често со ниво на автономија и интелигенција што го имитира човечкото однесување.
Споменатите производи можат да учат од интеракциите и искуствата, што доведува до постепено подобрување на перформансите.
Основачот на Мајкрософт, Бил Гејтс, минатата година предвиде дека голем број луѓе во иднина ќе имаат свој интелигентен агент, објавија медиумите.
„Во следните неколку години, тие целосно ќе го променат начинот на кој ги живееме нашите животи, онлајн и офлајн. Ќе имате свој личен асистент или агент за вештачка интелигенција. Тоа ќе биде гласот во вашето уво што ќе ви помогне со сè. Ќе ви помогне да одлучите каде да одите на одмор, како да се дружите со луѓе и многу повеќе“, рече тогаш Гејтс.
