Секој трет студент во земјава се запишува на Факултетот за информатички науки и компјутерско инженерство, или од вкупно 15.330 бруцоши, на ФИНКИ се запишале вкупно 4.722 што е над 30% од вкупниот број запишани студенти на прва година при високообразовните установи, покажуваат податоците на Државниот завод за статистика за академската 2023/2024 година. Според официналната статистика, вкупно 52.316 студенти се запишани во академската 2023/2024 година на македонските високообразовните установи. Бројот на студенти во оваа академска година е помал за 2,8 отсто во споредба со запишаните студенти во претходната.
Најголем дел од студентите – речиси 78 отсто, се запишале на државните високообразовни установи, додека 22 проценти запишале приватен факултет.
Оваа академска година, на прва година на студии се запишале вкупно 15.330 бруцоши.
Најмногу студенти и годинава има на најстариот државен универзитет во земјава – Универзитетот „Св. Кирил и Методиј“ во Скопје (УКИМ) со запишани вкупно 20.892 студенти.
Втор по бројност е Универзитетот во Тетово со 7.785 студенти, додека на трето место е Универзитетот „Гоце Делчев“ во Штип (УГД) со 6.385 студенти.
Гледано според уписите на факултетите, неколку години наназад најмногу студенти се запишани на Факултетот за информатички науки и компјутерско инженерство (ФИНКИ) при УКИМ – вкупно 4.722. Овој број е поголем во компарација со минатата година, кога на ФИНКИ студираа 4.468 студенти.
Втор факултет според број на запишани студенти е Факултетот за медицински науки при Тетовскиот универзитет (3.354 студенти), по што следуваат медицинските факултети при УГД (3.186) и УКИМ (2.915 запишани студенти). Во топ 5 најбројни факултети на државно ниво е и Економскиот факултет при УКИМ со запишани 2.022 студенти во академската 2023/2024 година.
Меѓу приватните високообразовни установи, неколку години по ред најпопуларен е Меѓународниот балкански универзитет (ИБУ) во Скопје, каде годинава се запишале 2.763 студенти. По него следува Универзитетот на Југоисточна Европа со 2.252 запишани студенти, а на трето место е Меѓународниот Славјански Универзитет во Свети Николе.
Бројот на запишани студентки е 30.704, односно студентките учествуваат со 58,7 отсто во вкупниот број запишани студенти на високообразовните установи во учебната 2023/2024 година, покажуваат податоците на ДЗС.
Од вкупниот број запишани студенти (53.821), речиси 88 % се редовни, а 12 отсто вонредни студенти.
