Невообичаено топло време за овој период на годината, доведе до откажување на Светскиот куп во алпско скијање во Австрија.
Меѓународната скијачка федерација (ФИС) објави дека паралелните дисциплини за жени и мажи планирани за Лех во Австрија следниот викенд се откажани поради недоволно време за подготовка на стазата.
ФИС додаде дека постои и „неповолна прогноза“ за наредниот период.
Натпреварите на скијачките патеки во Зермат во Швајцарија и Сервинија во Италија, беа откажани претходните два викенди. Одложените настани нема да бидат поместени.
Исто така, женскиот велеслалом кој требаше да ја отвори сезоната во Солден, во Австрија на 22 октомври, е одложен поради дождот и поместен е за крајот на декември.
Велеслаломот за мажите во Солден на 23 октомври, на кој победи олимпискиот првак Марко Одермат, беше единствена трка која е одржана досега оваа сезона.
Следните трки на календарот се два женски слаломи во Леви во Финска, на 19 и 20 ноември.
