Турскиот министер за внатрешни работи Али Јерликаја изјави дека бројот на загинати во пожарот во хотел во ски-центарот Карталкаја, во северна Туркије се искачи на 76.
„Утрово трагично загубивме 76 животи и имаме 51 повреден во пожарот што избувна во овој хотел во Болу Карталкаја. Пожарот е изгаснат, а во моментов се водат операции за ладење“, изјави Јерликаја.
„Министерството за внатрешни работи назначи двајца главни инспектори да го испитаат пожарот, додека Министерството за правда го назначи главниот обвинител во Болу и пет обвинители да работат на лице место со експерти. Нашиот претседател будно ја следи ситуацијата од првиот момент“, додаде тој.
Јерликаја додаде дека во рамките на истрагата за пожарот во хотелот досега се приведени девет лица.
Пожар избувна рано утринава во ски-центарот Карталкаја, кој се наоѓа на околу 295 километри источно од Истанбул.
На местото на несреќата се испратени бројни екипи за итни случаи од соседните градови, вклучително и пожарникари, единици за одговор при катастрофи и медицински тимови поддржани од хеликоптери.
Од хотелот се евакуирани околу 230 луѓе. Започната е истрага за причините за пожарот. Карталкаја, во провинцијата Бол, е една од најважните зимски туристички дестинации во Турција и привлекува илјадници посетители за време на скијачката сезона.
Во Турција, среда, 22 јануари е прогласен Ден на жалост, соопшти денеска претседателот Реџеп Таип Ердоган.
