Најмалку 66 лица загинаа, а 51 се повредени во пожар што избувна во хотел во ски-центарот Карталкаја во северна Туркије.
„Утрово трагично загубивме 66 животи и имаме 51 повреден во пожарот што избувна во овој хотел во Болу, Карталкаја. Пожарот е изгаснат, а во моментов се водат операции за ладење“, изјави во вторник министерот за внатрешни работи Али Јерликаја.
„Министерството за внатрешни работи назначи двајца главни инспектори да го испитаат пожарот, додека Министерството за правда го назначи главниот обвинител во Болу и пет обвинители да работат на лице место со експерти. Нашиот претседател будно ја следи ситуацијата од првиот момент, додаде тој.
Според гувернерот на Болу, Абдулазиз Ајдин, пожарот започнал во вторникот околу 00:27 часот по Гринич во ресторанот на 12-катниот хотел Гранд Картал, а брзо ја зафатил зградата.
На местото на настанот беа испратени екипи за итни случаи од соседните градови, вклучително и пожарникари, единици за одговор при катастрофи и медицински тимови поддржани од хеликоптери.
Властите евакуираа околу 230 гости од хотелот додека продолжуваат напорите за гаснење на пожарот.
Министерот за правда Јилмаз Тунч рече дека Канцеларијата на главниот јавен обвинител во Болу покрена судска истрага. Назначени се шест јавни обвинители, а формирана е и стручна комисија од пет лица.
Карталкаја, во провинцијата Болу, е една од главните дестинации за зимски туризам во Туркије. За време на скијачката сезона, одморалиштето привлекува илјадници посетители. Се наоѓа на 295 километри источно од Истанбул.
Молитви и сочувство
Турскиот претседател Реџеп Таип Ердоган рече дека од неговиот почеток внимателно го следи инцидентот преку соодветните институции.
„Посакувам Алахова милост за нашите граѓани кои ги загубија животите... и посакувам брзо закрепнување на нашите ранети“, рече тој во објавата на X.
Пакистанскиот премиер Шехбаз Шариф исто така изрази тага поради инцидентот.
„Го изразувам моето срдечно сочувство до мојот драг брат, претседателот Реџеп Таип Ердоган, турската нација, особено на ужалените семејства кои ги загубија своите најблиски во оваа несреќа и се молам за брзо закрепнување на повредените“, рече тој на X.
Хаџа Лахбиб, комесарката на ЕУ за еднаквост, подготвеност и кризен менаџмент, која моментално е во Туркије, исто така изрази „најдлабоко сочувство“ до Туркије и до семејствата на жртвите.
„ЕУ стои во солидарност и нуди поддршка преку Механизмот за цивилна заштита на ЕУ“, рече таа на X.
