Спасувачките тимови во северозападна Туркије трагаат по екипажот на потонатиот товарен брод „БАТУХАН А“ долг 69 метри во Мраморното Море.
„Во тек се интензивни напори за спасување на шестчлениот екипаж на потонатиот брод, за кој се верува дека се турски државјани“, изјави гувернерот на Бурса, Махмут Демирташ.
Демирташ рече дека два тима на крајбрежната стража, заедно со трет тим од областа Бандирма во провинцијата Баликесир на јужниот брег на Мраморното Море, биле испратени да се приклучат на спасувачката операција југозападно од островот Имрали.
Командата на крајбрежната стража на Туркије соопшти дека откако биле информирани дека трговскиот брод почнал да тоне поради неповолните временски и морски услови два брода од крајбрежната стража веднаш биле испратени на местото на инцидентот.
Се додава дека Генералниот директорат за крајбрежна безбедност испратил и два шлепери во областа.
„Како резултат на тековните операции за пребарување и спасување, идентификуван е чамец за спасување во областа каде што се проценува дека потонал товарниот брод“, се вели во соопштението и се додава дека операциите за пребарување и спасување се во тек.
На местото на настанот итно биле испратени и спасувачки глисери.
Демирташ додаде дека брановите во областа каде што потонал бродот достигнале висина од три метри, и додаде дека спасувачките напори се координираат со командата на окружната крајбрежна стража Мудања во Бурса.
