Министерот за внатрешни работи на Република Туркије, Сулејман Сојлу, изјави дека денес на терен се наоѓаат повеќе од 600.000 припадници на безбедносните сили, кои се одговорни да обезбедат непречено одвивање на изборниот процес.
Избирачките места низ Туркије се отворени утринава во осум часот по локално време (седум часот по средноевропско време), со што започна гласањето на претседателските и парламентарните избори.
Сојлу гласаше на подрачјето на Газиосманпаша во Истанбул. Тој посака изборите да бидат корисни за Туркије.
Како што изјави тој за новинарите по гласањето, заедно со гувернерите, началниците на полицијата и командантите на жандармеријата извршиле процена на процесот на гласање во Туркије.
„Процесот на гласање започна без никакви проблеми во целата наша Туркије“, рече Сојлу.
Според неговите зборови, Туркије има големо искуство и разбирање за безбедноста на изборите.
„Денес на терен имаме 601.000 припадници на безбедносните сили, полицијата, жандармеријата, нашата крајбрежна стража и обезбедувањето. Тие ќе ги извршуваат своите должности до крајот на изборите“, рече Сојлу.
Како што тој изјави, на терен има 79 хеликоптери и осум авиони.
Говорејќи за изборите во областите погодени од разорните земјотреси во февруари годинава, Сојлу рече дека досега изборниот процес во областа се одвива без никакви проблеми.
„Верувам дека Туркије ќе донесе правилна одлука. Се надевам дека тоа ќе биде добро и поволно за нашата нација, нашата земја и нашата иднина“, додаде Сојлу.
Граѓаните на Туркије денес гласаат на претседателските и парламентарните избори, избирајќи меѓу тројца претседателски кандидати и 24 политички партии и 151 независен кандидат за Парламентот, кој има вкупно 600 пратенички места.
Право на глас на изборите имаат 64,11 милиони луѓе, а првпат ќе може да гласаат повеќе од 4,9 милиони турски граѓани.
