Турскиот претседател Реџеп Таип Ердоган и малезискиот премиер Анвар Ибрахим најавија планови за двојно зголемување на обемот на трговската размена меѓу нивните земји од 5 на 10 милијарди долари.
Покрај економската соработка и потпишувањето на 11 договори во Малезија, лидерите се зафатија и со итни глобални прашања, со силен фокус на хуманитарната криза во Газа.
Говорејќи на настанот во вторникот, претседателот Ердоган повика на итен прекин на израелската окупација на палестинските територии, нагласувајќи ја потребата за одговорност.
„Израел мора да ја прекине окупацијата на палестинските земји и да ја надомести штетата што ја предизвика“, рече Ердоган.
Повторувајќи го долгогодишниот став на Туркије за решението за две држави, тој ја истакна важноста од формирање независна и суверена палестинска држава врз основа на границите од 1967 година, со источен Ерусалим како главен град.
Меѓународна солидарност
„Од суштинско значење е да се формира палестинска држава која ќе биде независна, суверена и територијално обединета, со источен Ерусалим како главен град“, рече тој.
Во врска со хуманитарната помош за Газа, Ердоган ја истакна важноста на меѓународната солидарност, особено меѓу земјите од АСЕАН, во решавањето на кризата.
„Ако сите членки на АСЕАН се здружат, верувам дека можеме да го надминеме овој предизвик“, рече тој.
Премиерот Анвар Ибрахим го пофали лидерството на Ердоган, опишувајќи го како бранител на правдата и човековите права.
„Чест ни е да бидеме домаќини на лидер кој стои како бранител на правдата и човековите права за муслиманскиот свет“, рече Анвар.
„Кога станува збор за Газа, Туркије презеде водечка улога. Ниту една друга земја не направи толку многу како Туркије во обезбедувањето хуманитарна помош“, забележа тој.
Анвар најави дека под малезиско претседавање, земјите од АСЕАН ќе бидат мобилизирани за обнова на Газа.
Зборувајќи за прекинот на огнот во Газа, тој рече дека Израел ја продолжува својата „агресивна и експанзионистичка политика“.
Тој ја доведе во прашање можноста за напредок, имајќи предвид дека Израел не се повлече од палестинската енклава.
Ердоган за време на посата на Куала Лумпуру, на малезискиот премиер му подари најнов модел од турскиот автомобил на електричен погон Тогг.
Ердоган ќе ги посети и Индонезија и Пакистан како дел од неговата регионална турнеја.
