Турското Министерство за одбрана објави дека турските војници ги преземаат сите неопходни мерки за зачувување на стабилноста во регионот на северна Сирија.
„Исто така, продолжуваме блиската соработка и координација со нашите сојузници во регионот“, изјави Зеки Актурк, советник за медиуми и односи со јавноста на Министерството за одбрана.
Тој нагласи дека турските вооружени сили континуирано и успешно ги продолжуваат операциите во земјата и надвор од границата против секакви закани и опасности, вклучително и терористичките организации ПКК/КЦК/ПЈД-ЈПГ, ДЕАШ и ФЕТО.
„Турските вооружени сили во изминатата недела неутрализираа 53 терористи, а од 1 јануари вкупно 2.664 терористи, од кои 1.392 на северот на Ирак и 1.272 на северот на Сирија“, рече Актурк.
Тој посочи дека будно ги следат активностите иницирани од опозициските групи во сирискиот регион Алепо.
„Исто така, нема да дозволиме терористичката организација ПКК/ЈПГ, која претставува закана за територијалниот интегритет на Сирија и регионалната безбедност, да ја искористи новата нестабилност“, рече Актурк.
Туркије се придржува кон договорите што ги постигна во зоните на операциите во Северна Сирија и очекува и другите да го сторат тоа, порача денес турското Министерство за национална одбрана.
„Овие прашања ја одразуваат нерешената внатрешна динамика во Сирија што произлегува од неуспехот на режимот да одговори на барањата на опозицијата“, се вели од Министерството.
Туркије ѝ даде приоритет на стабилноста во регионот преку неопходните мерки и тековната соработка со локалните засегнати страни, додаде Министерството.
На 27 ноември избувнаа судири меѓу силите на режимот на Башар ал Асад и антирежимските вооружени групи во западниот дел на Алепо во северна Сирија, што означи повторна ескалација на конфликтот по период на релативно затишје во граѓанската војна што избувна во Сирија во 2011 година.
