Туркије почна да работи на изградбата на својата трета нуклеарна централа во северозападниот регион Тракија за да ја задоволи зголемената побарувачка на енергија во земјата, изјави денес турскиот министер за енергетика и природни ресурси Фатих Донмез.
Донмез го нагласи зголеменото значење на нуклеарната енергија како чист извор на енергија за време на директниот пренос на телевизискиот канал ТРТ Хабер.
Тој објасни дека моментално е во тек изградбата на четвртиот реактор на првата нуклеарна централа во земјата „Акују“ во Мерсин, на брегот на Средоземното Море, од која првиот реактор се очекува да стартува со работа на крајот на годината, а потоа останатите реактори секоја наредна година.
Втората централа ќе се гради во Синоп, а во тек се работите за утврдување на точната локација на третата централа во регионот на Тракија.
Туркије има карактеристична предност како енергетски центар
Донмез истакна дека стратешката централна локација на земјата, опкружена со 15 земји производители и потрошувачи на енергија, ѝ дава предност во однос на другите енергетски центри, факт широко признат не само од Туркије, туку и од други земји.
Министерот Донмез рече дека Туркије увезува речиси 40 отсто од својот природен гас од Русија, но дека не се потпира само на Русија за својата планирана улога како енергетски центар.
Туркије, исто така, се надева дека ќе стане производител на природен гас откако природниот гас откриен во Црното Море ќе биде вклучен во електроенергетскиот систем.
Донмез нагласи дека Туркије увезува природен гас и од Азербејџан и Иран, и е прилично флексибилна во однос на увозот на течен природен гас од Обединетите Арапски Емирати (ОАЕ), Катар, Оман во регионот на Персискиот Залив, Египет и Алжир во регионот на Медитеранот, како и од Соединетите Американски Држави и Нигерија, и додаде дека земјата има дополнителни планови за увоз од Ирак, Либија и Израел.
