Повеќе од 160.000 Канаѓани потпишаа парламентарна петиција со која бараат нивната земја да му го одземе канадското државјанство на технолошкиот милијардер Илон Маск.
До раните утрински часови по локално време, петицијата за одземање на државјанството на Маск ја потпишаа околу 167.000 Канаѓани, а според канадските медиуми, нема индикации дека бројот на потписници наскоро ќе почне да се намалува.
Петиција за одземање на канадското државјанство на Маск, поради неговите блиски врски со американскиот претседател Доналд Трамп, кој постојано јавно ја изразуваше својата желба Канада да стане дел од Соединетите Американски Држави, беше покрената во Долниот дом од страна на Квалија Рид од Британска Колумбија.
Петициите, како онаа што беше започната да му се одземе државјанството на Маск, бараат 500 или повеќе потписи да бидат одобрени за презентација во Домот на општините на Канада и потенцијално да добијат официјален одговор од владата.
Маск, кој е роден во Јужноафриканската Република и раководи со американски компании, вклучувајќи ги Тесла, Спејс Икс и Платформа Х, има канадско државјанство преку неговата мајка Маја Маск и го предводи Одделот за владина ефикасност во администрацијата на Трамп.
Во петицијата за одземање на државјанството на Маск, поднесена на 20 февруари, тој се обвинува за „ангажман во активности спротивни на националниот интерес на Канада“, како сојузник на Трамп.
Во петицијата се тврди дека согласувањето со Трамп го прави Маск „член на странска влада која се обидува да го избрише канадскиот суверенитет“ и го повикува канадскиот премиер Џастин Трудо веднаш да му го одземе канадскиот пасош и државјанството.
Трамп често го исмејуваше Трудо нарекувајќи го „гувернер“, која означува позиција шеф на сојузните американски држави, и постојано го изразуваше своето мислење во јавноста дека Канада треба да стане 51-та држава на САД.
