Белорусија објави дека официјално ѝ е доделен статус на земја партнер на БРИКС.
Во соопштението на белоруското Министерство за надворешни работи се вели дека писмото на претседателот Александар Лукашенко, упатено до неговиот руски колега Владимир Путин и министерот за надворешни работи Максим Риженков, предадено му е на московскиот амбасадор во Минск, Борис Гризлов.
„Официјалниот одговор на писмената покана е задолжителен елемент на процедурата договорена од земјите членки за добивање партнерски статус. Од овој момент земјата официјално се смета за партнер на БРИКС“, се вели во соопштението.
Во соопштението е објавен текстот на писмото на Лукашенко во кое тој наведува дека од своето формирање БРИКС континуирано ја зајакнува мултилатералната соработка, станувајќи столб на мултиполарноста.
„Духот на заемно почитување и еднаквост, привлечноста на неговите цели со неумолива логика доведуваат до проширување на БРИКС“, се вели во соопштението што покажува дека Лукашенко му се заблагодарил на Путин за неговата поддршка.
Меѓу другите работи, статусот на земја партнер на БРИКС предвидува постојано учество на специјалните сесии на самитите на блокот и состаноците на министрите за надворешни работи, се додава во соопштението.
Во соопштението се вели дека партнерите можат да се приклучат на финалните документи на БРИКС, со што „ќе ја прошират својата географска покриеност и ќе се зајакне гласот на асоцијацијата во меѓународните прашања“.
Групата, првично основана во 2009 година со Бразил, Русија, Индија и Кина, формално ја прими Јужноафриканска Република во 2011 година, од кога постои називот БРИКС, составен од иницијалите на имињата на петте земји-членки.
Минатиот декември Аргентина, Египет, Етиопија, Иран, Саудиска Арабија и Обединетите Арапски Емирати (ОАЕ) се вклучија во БРИКС.
