Данската премиерка Мете Фредериксен во средата изјави дека ѝ дозволуваат на Украина да ја нападне Русија со данско оружје, се додека употребата е во рамките на меѓународното право.
„Добредојдени сте да го искористите она што и го дониравме на Украина, исто така надвор од Украина, односно за руски цели, доколку тоа е во рамките на меѓународното право“, рече Фредериксен во интервју за ТВ2.
Таа додаде дека генералниот секретар на НАТО Јенс Столтенберг бил многу јасен за ова прашање, дека е „во рамките на правилата кога водите војна, бидејќи Украина е таа што е нападната од Русија“.
Францускиот претседател Емануел Макрон во вторникот изјави дека на Украина треба да и се дозволи да користи француско оружје, вклучително и ракети со долг дострел, против цели во Русија.
„Сметаме дека треба да им дозволиме да ги неутрализираат воените области од кои се лансирани ракетите и во основа воените области од кои е нападната Украина“, изјави Макрон за новинарите на прес-конференција со германскиот канцелар Олаф Шолц во Бранденбург, Германија.
Шолц најави дека Германија нема да забрани употреба на германско оружје против руски воени цели.
Генералниот секретар на НАТО Јенс Столтенберг во вторникот ги повика Соединетите Држави и земјите од НАТО во Европската унија да и дозволат на Украина да користи ракети доставени од Западот за да ја нападне Русија.
Сепак, некои земји инсистираат нивното оружје да се користи само на украинска, а не на руска територија.
Високиот претставник на Европската унија за надворешна политика и безбедност, Жозеп Борел, смета дека западните лидери треба да го избегнат „ризикот од ескалација“ кога ќе дозволат украинските сили да користат оружје на руска територија.
Сепак, за време на состанокот во Брисел во вторникот, тој исто така рече дека нападите за самоодбрана врз воени цели на руска територија „се легитимен чин според меѓународното право кога се изведуваат на пропорционален начин“.
Борел нагласи дека секоја земја-членка на ЕУ треба да одлучува на индивидуална основа за ова прашање.
Рускиот претседател Владимир Путин во вторникот му се закани на Западот со „сериозни последици“ доколку на Украина и се дозволи да користи западно оружје со долг дострел на руска територија, објави „Москва тајмс“.
Според Путин, напад од Киев во Русија може да предизвика глобален конфликт.
Претходно овој месец, данската влада објави нов пакет воена помош за Украина во вкупна вредност од 5,6 милијарди дански круни.
Фредериксен неодамна ги повика другите европски земји да го следат примерот на Германија и да и обезбедат на Украина повеќе системи за воздушна одбрана „Патриот“.
Минатиот месец премиерката разговараше со нејзиниот полски колега Доналд Туск за можноста за создавање „железна купола“ за заштита на европските градови од воздушни напади во случај на војна.
