Претседателката на Европската комисија Урсула фон дер Лајен денеска изјави дека 2025 година мора да биде година на напредок за сите земји и оти приоритет во следните пет години ќе биде „комплетирање на Унијата“.
„Во наш заеднички интерес е да го обединиме европското семејство. На почетокот на овој нов мандат, сакам да бидам многу јасна - 2025 година мора да биде година на напредок за сите тие земји на нивниот пат кон членство во ЕУ врз основа на заслуги. Комплетирање на нашата унија е е во наш суштински интерес и ќе биде врвен приоритет во следните пет години“, рече Фон дер Лајен за време на годишната конференција на амбасадорите на ЕУ во Брисел.
Претседателката на Комисијата зборуваше за променливата состојба во светот и потребата од „подиректна и фокусирана“ надворешна политика на ЕУ, наведувајќи дека „се наоѓаме во ера на хиперконкурентна и хипер-трансакциска геополитика“.
Таа се осврна и на важноста на економската конкуренција во ЕУ и зајакнувањето на трговските партнерства со ЕУ и рече дека Унијатаќе продолжи да инвестира во иницијативата Глобална порта.
Кога станува збор за односите со САД, Фон дер Лајен рече дека ЕУ ќе биде подготвена за тешки преговори „каде што е потребно“ и да најде решенија каде што е можно.
„Да ги решиме сите незадоволства и да ги поставиме темелите за посилно партнерство“, рече Фон дер Лајен.
Таа додаде дека првиот приоритет на ЕУ ќе биде да работи на области каде интересите на ЕУ и САД се преклопуваат, од критичните синџири на снабдување до новите технологии.
„Ќе бидеме отворени и прагматични за тоа како да го постигнеме ова, но подеднакво јасно ќе ставиме до знаење дека секогаш ќе ги штитиме сопствените интереси, како и да е и секогаш кога е потребно. Ова секогаш ќе биде европскиот начин“, рече Фон дер Лејен.
Таа оцени и дека ова ќе биде „интензивна година“ во односите на ЕУ со Кина и нагласи дека ЕУ ќе продолжи да го намалува ризикот во економските односи со Кина.
Таа додаде дека има простор за конструктивен ангажман со Кина и изнаоѓање решенија кои се од заеднички интерес.
Во врска со војната во Украина, таа нагласи дека тоа е „најцентралната криза со најголеми последици за иднината на Европа“ и истакна дека приоритет на ЕУ е зајакнување на отпорот на Украина.
