Девет осомничени членови на руска шпионска мрежа се уапсени за наводно координирање на кампања за саботажа во Полска, изјави денеска премиерот Доналд Туск.
„Во моментов имаме девет лица приведени и обвинети за директна вмешаност во акти на саботажа во Полска на барање на руските служби. Најважно е целосно да се врати контролата врз она што се случува на територијата на полската држава. Ја враќаме оваа контрола “, рече Туск.
Според полскиот премиер неопходна е истрага за влијанието на руските агенти и Кремљ врз она што се случува во Полска и додаде дека ќе биде формирана комисија.
„Имаше случај од висок профил во Вроцлав каде беше спречен обид да се запали фабрика за производство на боја, со хемиска фабрика во близина. Нарачана е од руските служби, без какво било сомневање. Имаме работа со акти на саботажа во Литванија, подметнување пожар на складиштето на ИКЕА. Истите луѓе кои се приведени таму, исто така, може да бидат поврзани со обиди за саботажа, главно подметнување пожар, во Полска“, посочи тој.
Ова следи по инциденти од висок профил, вклучително и пожари во пазар во Варшава и на депониите.
Туск минатата недела рече дека Полска ќе одвои дополнителни 25 милиони долари за зајакнување на своите разузнавачки служби, предупредувајќи на зголемена закана од Русија, особено поради улогата на Полска како дистрибутивен центар за снабдување на Украина.
Туск додаде дека руските обиди да ги дестабилизира европските земји, особено Полска и балтичките земји, ќе се интензивираат во пресрет на европските избори следниот месец.
