Европската унија би можела да ја казни, да ја суспендира или дури и да ја забрани платформата за социјалните медиуми Х, доколку не ги почитува правилата на блокот, изјави во понеделник извршниот потпретседател на Европската комисија (ЕК), Стефан Сежурн.
Извршниот потпретседател на ЕК за просперитет и индустриска стратегија и поранешен француски министер за надворешни работи, Стефан Сежурн потсети во интервју за „Франс Интер“ дека еврокомесарот Хена Виркунен минатата недела ја продолжи истрагата за Х на Илон Маск, порано познат како Твитер.
„ЕУ има правила што ќе се применуваат“, нагласи Сежурн, додавајќи дека извештајот на еврокомесарот ќе ги земе предвид сите дебати што се одржаа во последните недели, вклучително и оние за политичкото мешање на Маск во Европа, откако тој изрази поддршка за екстремно десничарската Алтернатива за Германија (AфД) пред изборите на 23 февруари.
„Извештајот ќе излезе, досието ќе му биде предадено на судијата, санкциите можат да бидат многу силни и да изнесуваат милијарди евра: На крајот, ако не се почитува, може да доведе до забрана, суспензија на Х, “ објасни Сежурн.
Додека новоизбраниот американски претседател Доналд Трамп се подготвува да ја преземе функцијата подоцна денеска, претставник на ЕУ рече дека Американците „остануваат“ сојузници на блокот „но повеќе ќе ги бранат своите интереси“.
„Американците сакаат да се одвојат од Европа за да се фокусираат на Пацификот, време е да се реализира европската одбрана“, нагласи Сежурн.
Истакнувајќи дека администрацијата на Трамп користела „јазик на сила“, Сежурне рече дека „најмалата европска недоследност“ ќе се смета за слабост.
