Европската Унија (ЕУ) денес објави дека ги суспендира санкциите за енергетскиот, транспортниот и банкарскиот сектор во Сирија за да ѝ помогне на земјата да се обнови по падот на режимот на Башар ал Асад.
Во соопштението ЕУ наведе дека овој потег има цел „да го олесни ангажманот со Сирија, нејзините луѓе и бизниси, во клучните области на енергетиката и транспортот, како и да ги олесни финансиските и банкарските трансакции поврзани со таквите сектори и оние што се потребни за хуманитарни и реконструкциски цели“.
Клучните одредби од денешната одлука вклучуваат суспензија на мерките што ги засегаат енергетскиот и транспортниот сектор, а кои вклучуваат нафта, гас, електрична енергија и транспортна инфраструктура.
Покрај тоа, пет сириски ентитети, вклучително и Индустриската банка, Популарната кредитна банка, Штедилницата, Земјоделската кооперативна банка и Сирија Арап ерлајнс, беа отстранети од списокот на санкционирани организации на ЕУ.
Овој потег ги олеснува финансиските трансакции со Централната банка на Сирија за хуманитарни цели и реконструкција.
ЕУ одлучи да го продолжи хуманитарното изземање на неодредено време, обезбедувајќи континуирана поддршка за напорите за давање помош.
