Во текот на 2023 година, Европската унија извезла велосипеди (електрични и неелектрични) во вредност од 1,03 милијарди евра, што претставува пад од 10 отсто во споредба со истиот период пред една година, објави денеска Евростат.
Од канцеларијата на ЕУ задолжена за статистика посочуваат дека вредноста на увозот е значително поголема и изнесува 1,98 милијарди евра, но и во овој поглед е забележано намалување од 21 отсто во однос на 2022 година.
Во текот на изминатата година Европската унија извезла 293.000 електрични велосипеди, што е за 21 отсто помалку од лани, а увезла 867.000 од нив (27 отсто помалку).
Во исто време, ЕУ извезла 852.000 неелектрични велосипеди (17 отсто помалку), а увезла 3,5 милиони, односно 34 отсто помалку од 2022 година.
Во текот на минатата година, Швајцарија беше главна земја за пласман на неелектрични велосипеди од ЕУ со 30 отсто од вкупниот извоз во земји надвор од ЕУ, потоа Велика Британија (20 отсто) и САД (шест отсто).
Швајцарија и Велика Британија беа исто така главни дестинации за извоз на електрични велосипеди, со 46 и 26 отсто од вкупниот извоз, а потоа следат САД (10 отсто) и Норвешка (девет отсто).
Минатата година Европската унија увезла најмногу неелектрични велосипеди од Тајван (32 отсто), Камбоџа (28), Кина и Бангладеш (по 8 отсто).
Поголемиот дел од електричните велосипеди во Европската унија се увезени и од Тајван (59 проценти), потоа од Виетнам (16 проценти), Швајцарија (11 проценти) и Кина (шест проценти).
