ЕУ и Палестинската управа (ПА) се договорија за итна финансиска поддршка за решавање на најитните финансиски потреби на Палестинците во услови на тековната разорна израелска војна во Газа.
„Европската комисија и Палестинската управа потпишаа писмо за намери во кое се утврдува стратегија за справување со критичната буџетска и фискална ситуација на палестинската економија, чии структурни ранливости се влошени со последиците од војната во Газа и многу потребните нерешени прашања и реформи“, се вели во соопштението на Комисијата.
Како прв чекор, краткорочната итна финансиска поддршка, во вредност од 400 милиони евра, ќе и биде дадена на управата за да ги реши најитните финансиски потреби и да поддржи суштинска и кредибилна реформска агенда.
Поддршката ќе биде исплатена во три исплати помеѓу јули и септември 2024 година, под услов да се постигне напредок во спроведувањето на реформската агенда на ПА.
Како втор чекор, ќе биде лансирана Сеопфатната програма за закрепнување и отпорност на Палестинците и ќе се бара финансирање од други донатори. Како таква, комисијата предложи да се формира платформа за координација на донатори на Палестина од есента 2024 година, до крајот на 2026 година.
„Заедно, ги поставуваме темелите за економска и политичка стабилност на Западниот Брег. И ги поставуваме основите за обнова на Газа. Ни треба итен и траен прекин на огнот. И ние мора да се подготвиме за следниот ден“, рече Урсула фон дер Лајен претседателката на Комисијата на ЕУ.
Исто така, шефот за надворешна политика на Унијата, Жозеп Борел, рече дека итноста да се засили поддршката за ПА никогаш не била толку висока“.
„Но, потребите се огромни: повторно го повикуваме Израел итно да ги ослободи сите даночни приходи“, додаде Борел.
