Високиот претставник на Европската унија за надворешни работи и безбедносна политика, Жозеп Борел и шпанската влада повторија дека нема да ги признаат резултатите од претседателските избори одржани на 28 јули во Венецуела, на кои победи Николас Мадуро.
„Проверката на изборните резултати во Венецуела сè уште не е извршена. Нашата надеж дека тоа ќе се случи се намалува од ден на ден. Нема да има признавање доколку изборните записи не бидат транспарентно проверени“, рече Борел во Шпанија.
Официјалната шпанска новинска агенција, врз основа на извори од Министерството за надворешни работи, наведе дека владата нема да ги признае резултатите од изборите во Венецуела додека изборната евиденција не биде објавена на сеопфатен и проверен начин.
Шпанската влада „инсистира на целосна транспарентност“ во однос на изборните резултати во Венецуела и повика на „почитување на правата на Венецуелците мирно да демонстрираат и слободно да ги изразуваат своите политички ставови“.
Највисокото правосудно тело на Венецуела, Врховниот суд на правдата, вчера ја објави својата одлука со која потврди дека Николас Мадуро победил на претседателските избори одржани на 28 јули.
Судот ги одобри резултатите што ги објави изборниот совет на Венецуела на 29 јули. Следствено, Мадуро по трет пат победи на претседателските избори со 51,20 отсто од гласовите.
Кандидатот на опозициската коалиција Едмундо Гонзалес и лидерот на опозицијата Марија Корина Мачадо ги отфрлаат изборните резултати.
