Словачкиот премиер Роберт Фицо изјави денеска дека не разбира што прават лидерите на Европската унија на состанокот за Украина во Париз со агенда која, како што рече, нема никаква врска со ЕУ.
Фицо денеска телефонски разговараше со претседателот на Европскиот совет, Антонио Коста.
Тој го праша зошто како претседател на најважното тело на ЕУ ја прифатил поканата за состанок на седум земји-членки и Велика Британија во Париз, на кој би требало да се разгледа прашањето за учеството на странски војници на територијата на Украина како безбедносна гаранција за Украина по завршувањето на војната.
Фицо смета дека учеството на највисоките претставници на ЕУ на состанокот во Париз е настан кој не придонесува за доверба во ЕУ.
„ЕУ нема овластување да донесува одлуки за учество на странски војници на територијата на друга држава. Ние го почитуваме, без никакви приговори, состанокот на државите кои се подготвени да испратат свои војници во Украина. Сепак, ова е тема со која ЕУ нема никаква врска и не треба да ја коментира“, напиша Фицо на Фејсбук.
И унгарскиот министер за надворешни работи Петер Сијарто ја критикуваше средбата организирана од францускиот претседател Емануел Макрон во Париз.
„Европските лидери, поддржувачи на војната и противниците на Трамп, се состануваат денеска во Париз за да ги блокираат мировните напори во Украина. Сепак, со доаѓањето на Доналд Трамп, ерата на интервенционизам заврши“, рече Сијарто, поздравувајќи го обновувањето на американско-рускиот дијалог на највисоко ниво.
Тој рече дека дијалогот меѓу американскиот и рускиот претседател Доналд Трамп и Владимир Путин дава најдобра надеж за завршување на војната.
„За разлика од тие состаноци во Париз и кои поттикнаа ескалации три години, ние ги поддржуваме мировните напори и преговорите“, рече Сијарто.
